راہل گاندھی نے ’سی بی آئی‘ ہنگامہ کا تار ’رافیل‘ سے جوڑا

’’سی بی آئی چیف آلوک ورما رافیل گھوٹالہ کے کاغذات اکٹھا کر رہے تھے۔ انھیں زبردستی چھٹی پر بھیج دیا گیا۔ وزیر اعظم کا پیغام بالکل صاف ہے، جو بھی رافیل کے ارد گرد آئے گا، ہٹا دیا جائے گا، مٹا دیا جائے گا۔ ملک اور آئین خطرے میں ہے۔‘‘ یہ الفاظ کانگریس صدر راہل گاندھی کے ہیں جو انھوں نے ٹوئٹر پر لکھے ہیں۔ کچھ اسی طرح کے الفاظ وہ راجستھان اسمبلی انتخابات کے مدنظر انتخابی تشہیر کے لیے پہنچے جھالاواڑ میں اپنی تقریر کے دوران بھی دہرا رہے ہیں۔ اس سلسلے میں کانگریس صدر نے جلسہ گاہ میں موجود لوگوں سے مخاطب ہوتے ہوئے کہا کہ ’’میں انل امبانی، رافیل اور پی ایم مودی کی کہانی بتاتا ہوں۔ ہمارے یہاں ایک کمپنی ہے ایچ اے ایل جس نے پاکستان کو شکست دینے والا جہاز بنایا۔ ایچ اے ایل کمپنی پر ایک روپے کا قرض نہیں ہے۔ مودی وزیر اعظم بننے پر فرانس جاتے ہیں جس کے ساتھ انل امبانی بھی جاتے ہیں۔ انھیں رافیل کا کانٹریکٹ دے دیا گیا۔ امبانی نے اپنی زندگی میں کبھی جہاز نہیں بنایا۔ کمپنی پر 45 ہزار کا قرض ہے۔‘‘

اس طرح راہل گاندھی نے رافیل معاہدہ پر وزیر اعظم نریندر مودی کے ذریعہ ایچ اے ایل کو نظر انداز کرنے اور انل امبانی کی کمپنی کو نااہل ہوتے ہوئے بھی ٹھیکہ دینے کی بات ایک نئے انداز میں عوام کے سامنے رکھ دی۔ ساتھ ہی انھوں نے اس کو سی بی آئی سے جوڑتے ہوئے یہ بھی کہہ دیا کہ ’’کل رات چوکیدار (وزیر اعظم نریندر مودی) نے سی بی آئی کے ڈائریکٹر کو ہٹا دیا کیونکہ سی بی آئی رافیل پر سوال اٹھا رہی تھی۔‘‘

قابل ذکر ہے کہ اس سے قبل دہلی کے وزیر اعلیٰ اور عام آدمی پارٹی کنوینر اروند کیجریوال کے ساتھ ساتھ سینئر وکیل پرشانت بھوشن نے بھی سی بی آئی ڈائریکٹر آلوک ورما کو چھٹی پر بھیجے جانے کو مشتبہ قرار دیا ہے اور اندیشہ ظاہر کیا ہے کہ وہ رافیل معاہدہ کی جانچ کرنے والے تھے اسی لیے انھیں چھٹی پر بھیج دیا گیا ہے۔

بہر حال، راہل گاندھی نے اپنی تقریر کے دوران مرکزی وزیر مالیات ارون جیٹلی کو بھی تنقید کا نشانہ بنایا۔ انھوں نے کہا کہ ’’مودی جی 35 ہزار کروڑ روپے والے منریگا کو گڈھا کھودنے والا کہتے ہیں لیکن نیرو بھائی، میہل بھائی 35 ہزار کروڑ روپے لے کر بھاگتا ہے اور میہل چوکسی ارون جیٹلی کی بیٹی کو آئی سی آئی سی آئی بینک اکاؤنٹ میں پیسہ دیتا ہے۔‘‘