وزیر اعلیٰ آتشی کا کیجریوال کے لیے ’کرسی‘ خالی چھوڑنا عوام کی امیدوں کو شدید جھٹکا پہنچانے والا عمل: دیویندر یادو

دہلی کی نو منتخب وزیر اعلیٰ آتشی نے آج اپنے عہدے کی ذمہ داری سنبھال لی۔ لیکن ان کے ایک فیصلے کی اپوزیشن پارٹیاں کانگریس اور بی جے پی سخت تنقید کر رہی ہیں۔ دراصل آتشی نے وزیر اعلیٰ کی کرسی پر نہ بیٹھتے ہوئے اس کے بغل میں ایک کرسی لگا کر بیٹھی ہیں اور کہا ہے کہ کیجریوال جب از سر نو وزیر اعلیٰ بنیں گے تو اس خالی کرسی پر بیٹھیں گے۔

دہلی کانگریس صدر دیویندر یادو نے اس معاملے میں سخت رد عمل ظاہر کرتے ہوئے کہا ہے کہ ’’وزیر اعلیٰ آتشی کے ذریعہ بدعنوانی کے الزام میں 6 ماہ جیل میں رہ کر آئے ایک شخص (کیجریوال) کی مریادا پرشوتم بھگوان رام سے موازنہ کرنے پر مجھے سخت اعتراض ہے۔ آتشی کے ذریعہ وزیر اعلیٰ دفتر میں ایک کرسی خالی چھوڑ کر یہ کہنا کہ جس طرح 14 سال کے وَنواس کے بعد بھگوان رام نے ایودھیا کی حکومت سنبھالی، 4 ماہ بعد اروند کیجریوال وزیر اعلیٰ کی کرسی سنبھالیں گے، درست نہیں۔‘‘ انھوں نے مزید کہا کہ دہلی کی عوام کو صرف 4 ماہ ہی عآپ اور کیجریوال کو برداشت کرنا ہے، کیونکہ روزانہ کی ڈرامہ بازی سے دہلی کی عوام پریشان ہو چکی ہے۔

دیویندر یادو کا کہنا ہے کہ وزیر اعلیٰ دفتر میں پہنچ کر آتشی نے بدعنوان اروند کیجریوال کے نام پر سبھی اخلاقیات کی دھجیاں اڑاتے ہوئے سبھی حدیں پار کر دی ہیں۔ آتشی جی سے دہلی کی عوام کو جو بھی امیدیں تھیں، وہ ان کے اس غیر جمہوری اور غیر آئینی قدم سے پوری طرح چکناچور ہو گئی ہیں۔ آتشی کا کیجریوال کے لیے ’کرسی‘ خالی چھوڑنا عوام کی امیدوں کو شدید جھٹکا پہنچانے والا عمل ہے۔ دیویندر یادو نے مزید کہا کہ کیجریوال کو ملی ضمانت پر آتشی کا یہ کہنا کہ سپریم کورٹ نے بھی کیجریوال کی گرفتاری کو رنجش کا سبب بتایا، یہ سپریم کورٹ کی بے عزتی ہے۔ ایسا اس لیے کیونکہ عدالت عظمیٰ نے آبکاری گھوٹالہ مین کیجریوال کی گرفتاری کو درست بتایا تھا۔

دہلی کانگریس صدر دیویندر یادو نے آتشی پر حملہ آور رخ اختیار کرتے ہوئے کہا کہ آتشی نے خود کو ’ڈمی وزیر اعلیٰ‘ پیش کیا ہے اور اس کے بعد تو حکومت سے کوئی امید بچی ہی نہیں۔ دہلی کی عوام بہت امیدیں لگائے بیٹھی تھی، لیکن آج آتشی کی حرکت سے لوگوں کو بہت تکلیف ہوئی ہے۔ پہلے کیجریوال اور اب آتشی دہلی کی عوام کے مذہبی جذبات کے ساتھ کھلواڑ کر کے ادنیٰ درجہ کی سیاست کر رہے ہیں۔ جس طرح عآپ نے لوگوں کے جذبات کے ساتھ کھلواڑ کیا ہے، اس سے اب بی جے پی اور عآپ ایک دوسرے کی مترادف نظر آ رہی ہیں۔