مہوا موئترا کی عرضی پر فیصلہ چیف جسٹس ڈی وائی چندرچوڑ لیں گے

سپریم کورٹ میں بدھ کے روز ترنمول کانگریس لیڈر مہوا موئترا کی لوک سبھا رکنیت ختم کیے جانے کو چیلنج کرنے والی عرضی کو ایک بار پھر رکھا گیا۔ اس دوران چیف جسٹس نے کہا کہ عرضی پر وہ غور کریں گے۔ سپریم کورٹ نے مہوا موئترا کی عرضی پر تبصرہ کرتے ہوئے کہا کہ ٹی ایم سی لیڈر کی لوک سبھا سے معطلی کو چیلنج کرنے والی عرضی کو فہرست بند کیے جانے سے متعلق فیصلہ چیف جسٹس آف انڈیا ڈی وائی چندرچوڑ لیں گے۔

ایک میڈیا رپورٹ میں بتایا گیا ہے کہ مہوا موئترا کی عرضی پر چیف جسٹس چندرچوڑ نے خود تبصرہ کیا ہے اور یقین دہانی کرائی ہے کہ وہ اسے فہرست بند کرنے پر غور کریں گے۔ اس سے قبل جج سنجے کشن کول اور سدھانشو دھولیا کی بنچ کے سامنے مہوا کی عرضی کو فوراً فہرست بند کرنے کی اپیل کی گئی تھی۔ اس پر جسٹس کول نے سینئر وکیل ابھشیک منو سنگھوی کو مطلع کیا کہ اس پر فیصلہ سی جے آئی لیں گے۔

واضح رہے کہ ٹی ایم سی لیڈر مہوا موئترا نے لوک سبھا سے اپنی معطلی کو چیلنج پیش کرتے ہوئے سپریم کورٹ کا دروازہ کھٹکھٹایا ہے۔ انھیں پیسہ لے کر لوک سبھا میں سوال پوچھنے کے الزام میں یہ سزا ملی ہے۔ لوک سبھا کی اخلاقیات کمیٹی نے جانچ کے بعد اپنی رپورٹ لوک سبھا میں پیش کی تھی جس میں مہوا کی رکنیت ختم کرنے کی سفارش کی گئی تھی۔ لوک سبھا نے اس سفارش کو منظوری دے دی، جس کے بعد اپوزیشن اراکین نے ناراضگی کا بھی اظہار کیا تھا۔