تریپورہ، میگھالیہ اور ناگالینڈ میں اسمبلی انتخابات 18 اور 27 فروری کو

انتخابی کمیشن نے تین ریاستوں تریپورہ، میگھالیہ اور ناگالینڈ میں ہونے والے اسمبلی انتخابات کی تاریخوں کا اعلان کر دیا ہے۔ چیف الیکشن کمشنر اے کے جیوتی نے ایک پریس کانفرنس کرتے ہوئے بتایا کہ تینوں ریاستوں میں دو مراحل میں انتخابات ہوں گے۔ پہلے مرحلے میں 18 فروری کو تریپورہ میں انتخاب ہوگا جب کہ دوسرے مرحلے میں میگھالیہ اور ناگالینڈ میں 27 فروری کو ووٹ ڈالے جائیں گے۔ تینوں ریاستوں کے نتائج ایک ساتھ 3 مارچ کو آئیں گے۔ انتخابات کی تاریخوں کےا علان کے ساتھ ہی تینوں ریاستوں میں انتخابی ضابطہ اخلاق نافذ ہو گیا ہے۔ اب سے سبھی سیاسی پروگراموں کی ویڈیوگرافی کرائی جائے گی۔

چیف الیکشن کمشنر کا کہنا ہے کہ بارڈر چیک پوسٹ پر سی سی ٹی وی کیمرے لگائے جائیں گے تاکہ کسی طرح کی غلط حرکت پر نگاہ رکھی جا سکے۔

انتخابی کمیشن کے مطابق ان انتخابات میں ای وی ایم کے ساتھ وی وی پیٹ کا استعمال کیا جائے گا۔ پریس کانفرنس کے دوران چیف الیکشن کمشنر اے کے جیوتی نے یہ بھی کہا کہ امیدوار ای وی ایم کی جانچ بھی کر سکتے ہیں۔ ان تینوں ریاستوں میں اسمبلی کی 60-60 سیٹیں ہیں اور ان تینوں ریاستوں میں اسمبلی کی مدت کار مارچ میں ختم ہو رہی ہے۔ ناگالینڈ میں ناگا پیپلز فرنٹ کی حکومت ہے۔ اس حکومت کو بی جے پی کی حمایت حاصل ہے۔ دوسری طرف میگھالیہ میں کانگریس کی حکومت ہے جب کہ تریپورہ میں سی پی ایم کی قیادت والی بایاں محاذ 1993 سے برسراقتدار ہے۔