چھتیس گڑھ: جادو ٹونے کے شک میں 5 افراد کا پیٹ پیٹ کر قتل

رائے پور: چھتیس گڑھ کے سُکما ضلع کے ایک گاؤں میں جادو ٹونے کے شک پر 3 خواتین سمیت 5 افراد کو پیٹ پیٹ کر قتل کر دیا گیا۔ یہ افسوسناک واقعہ ضلع کے کونٹا تھانے کی حدود میں واقع ایکتل گاؤں میں پیش آیا، جہاں دو دو جوڑوں اور ایک خاتون کو بے رحمی سے قتل کیا گیا۔ پولیس کے مطابق مقتولین کی شناخت کَنّا (34)، اس کی بیوی بِیری، بُچّا (34)، اس کی بیوی آرزو (32) اور ایک اور خاتون کرکا لچھی (43) کے طور پر کی گئی ہے۔

واقعے کے فوراً بعد پولیس نے کارروائی کرتے ہوئے 5 مشتبہ افراد کو گرفتار کر لیا ہے۔ ان افراد میں راجیش (21)، ہِڈما، کرم سَتیم (35)، کنجم مکیش (28) اور پودیام اینکا شامل ہیں۔ پولیس کا کہنا ہے کہ مزید تحقیقات جاری ہیں اور تمام گرفتار افراد شدہ سے پوچھ گچھ کی جا رہی ہے۔

پولیس کا کہنا ہے کہ یہ واقعہ اس شک کی بنا پر پیش آیا کہ مقتولین جادو ٹونے میں ملوث تھے۔ واقعے کی اطلاع ملتے ہی پولیس کے اعلیٰ حکام موقع پر پہنچے اور معاملے کی تفصیلی چھان بین شروع کر دی گئی۔

اسی طرح کی ایک اور دل دہلا دینے والی واردات چھتیس گڑھ کے ضلع بلودا بازار-بھٹاپارا میں چند روز قبل سامنے آئی تھی، جہاں جادو ٹونے کے شبہ میں ایک ہی خاندان کے 4 افراد کو بے دردی سے قتل کر دیا گیا۔

اس واقعے میں مقتولین میں ایک 11 ماہ کا شیر خوار بچہ بھی شامل تھا۔ ان واقعات نے علاقے میں شدید خوف و ہراس پھیلایا ہے، اور پولیس عوام میں بیداری مہم چلانے کا ارادہ رکھتی ہے تاکہ اس قسم کے واقعات کا سد باب کیا جا سکے۔

چھتیس گڑھ کے مختلف دیہی علاقوں میں جادو ٹونے کا عقیدہ عام ہے، جس کی وجہ سے اکثر لوگ بے گناہ افراد کو نشانہ بناتے ہیں۔ حکومت اور پولیس اس مسئلے سے نمٹنے کے لیے اقدامات اٹھا رہی ہیں، تاہم اس قسم کے واقعات بدستور پیش آ رہے ہیں۔