چھتیس گڑھ: بھوپیش کابینہ میں توسیع، موہن مرکام نے وزیر کے طور پر حلف لیا

رائے پور: دو دن پہلے چھتیس گڑھ پردیش کانگریس صدر کے عہدے سے ہٹائے گئے موہن مرکام نے آج وزیر کے عہدے کا حلف لیا۔ راج بھون کے دربار ہال میں منعقدہ ایک پروگرام میں گورنر وشوبھوشن ہری چندن نے مرکام کو عہدہ اور رازداری کا حلف دلایا۔

اس موقع پر وزیر اعلی بھوپیش بگھیل، اسمبلی کے اسپیکر ڈاکٹر چرنداس مہنت، ریاستی کابینہ کے ارکان، معززین نیز ریاست کے انتظامی اور پولیس افسران موجود تھے۔ ریاستی اسکولی تعلیم کے وزیر ڈاکٹر پریم سائی سنگھ ٹیکام سے کل ہی استعفیٰ لے لیا گیا تھا۔ ان کے استعفیٰ سے خالی ہونے والے عہدے پر مرکام کو حلف دلایا گیا۔ تقریباً 55 ماہ پرانی بھوپیش کابینہ میں یہ آخری ردوبدل سمجھا جا رہا ہے۔

مرکام ریاست کی کونڈاگاؤں اسمبلی سیٹ سے دوسری بار ایم ایل اے منتخب ہوئے ہیں۔ ریاستی کانگریس کے صدر کے عہدے پر ان کی تین سال کی مدت گزشتہ سال ہی پوری ہو گئی تھی، اس کے بعد سے ہی ان کی دستبرداری کے بارے میں قیاس آرائیاں جاری تھیں۔ کل کابینہ سے ہٹائے گئے ڈاکٹر ٹیکام کا تعلق قبائلی سماج سے ہے اور مرکام بھی قبائلی سماج سے ہیں۔