چندرابابو نائیڈو کی اہلیہ نے تلگودیشم قائدین کے خلاف پولیس کارروائی کی مذمت کی

امراوتی: تلگو دیشم پارٹی (ٹی ڈی پی) کے صدر این چندرا بابو نائیڈو کی اہلیہ این بھونیشوری نے پولیس کی زیادتیوں کی مذمت کی ہے۔ انہوں نے کہا کہ پولیس کے ذریعہ تلگودیشم قائدین اور کارکنوں کی گرفتاری تشویشناک ہے۔ انہوں نے سابق وزیر کولو رویندر کے خلاف کارروائی کرنے پر پولیس کو تنقید کا نشانہ بنایا۔

انہوں نے سوال کیا کہ ’’ملک میں اور کہاں ایک سابق وزیر کو اپنی والدہ کی برسی میں شرکت سے روکا جاتا ہے؟ یہ کیسا قانون اور انصاف ہے؟‘‘ انہوں نے کہا کہ اس واقعہ سے یہ سمجھا جا سکتا ہے کہ چندرا بابو نائیڈو نظام کی ناکامی پر تشویش کا اظہار کیوں کرتے تھے۔

دریں اثنا، آندھرا پردیش ہائی کورٹ نے پولیس کو ہدایت دی ہے کہ وہ کولو رویندرا کی تحویل سے متعلق تمام تفصیلات کے ساتھ حلف نامہ داخل کرے۔

ہائی کورٹ نے یہ ہدایت ان کی بیوی نیلیما کی طرف سے دائر کی گئی ہیبیس کارپس کی درخواست پر دی۔ انہوں نے الزام لگایا کہ کولو رویندر کو پولیس نے غیر قانونی طور پر چند گھنٹوں کے لیے حراست میں رکھا تھا۔ پولیس نے عدالت کو بتایا کہ رویندر کے خلاف مقدمہ درج کر لیا گیا ہے۔ اگرچہ پولیس نے انہیں نوٹس دینے کی کوشش کی لیکن انہوں نے اسے قبول کرنے سے انکار کر دیا۔

عدالت نے پولیس کو تمام معلومات پیش کرنے کی ہدایت کرتے ہوئے سماعت ملتوی کر دی۔ اگلی سماعت دسہرہ کی تعطیلات کے بعد ہوگی۔ خیال رہے کہ ٹی ڈی پی پولت بیورو کے رکن رویندرا کو پیر کے روز پولیس نے حراست میں لیا تھا تاکہ انہیں جیل میں بند چندرا بابو نائیڈو کے ساتھ اظہار یکجہتی کے لیے راجمندری جانے سے روکا جا سکے۔

انہیں مبینہ طور پر دن بھر حراست میں رکھنے کے بعد شام کو رہا کر دیا گیا۔ منگل کو انہیں دوسرے دن بھی خانہ نظر بند رکھا گیا۔ پولیس نے رویندر کو اپنی ماں کی برسی کے پروگرام میں شرکت کی بھی اجازت نہیں دی۔