مرکزی ٹیم کے دورے کا مقصد سیاسی وائرس کو پھیلانا: ترنمو ل کانگریس

کولکاتا: مغربی بنگال میں کورونا وائرس سے نمٹنے اور لاک ڈاؤن کا جائزہ لینے کے لئے دورہ کررہی مرکزی بین وزارتی ٹیم کی تنقید کرتے ترنمول کانگریس نے کہا ہے کہ مرکزی ٹیم ”سیاسی وائرس“ کو پھیلانے میں زیادہ دلچسپی کا مظاہرہ کر رہی ہے اور یہ بہت ہی شرمناک بات ہے۔ خیال رہے کہ 20 اپریل سے ہی ریاست کے سات اضلاع کولکاتا، ہوڑہ، شمالی 24پرگنہ، مشرقی مدنی پور، جلپائی گوڑی، دارجلنگ اور کالمپونگ کا دورہ کررہی ہے۔

راجیہ سبھا میں ترنمول کانگریس کے لیڈر و پارٹی ترجمان ڈیریک اوبرائن نے کہا کہ ”امیدوں کے مطابق مرکزی ٹیم کے بنگال دورہ کا کوئی مقصد نہیں ہے۔ ان علاقوں کا دورہ کر رہی ہے جہاں ہاٹ اسپاٹ نہیں ہیں۔ بنگال آڈٹ کمیٹی سے متعلق بات کر رہے ہیں جب کہ یہ کمیٹی اپریل کے پہلے ہفتے سے ہی کام کر رہی ہے

پارٹی ترجمان ڈیریک اوبرائن نے کہا کہ اس ٹیم کا بنیادی مقصد ”سیاسی وائرس پھیلانا ہے“ یہ ٹیم شرمناک حرکت کا مظاہرہ کر رہی ہے۔ انہوں نے کہا کہ یہ ٹیم بنگال میں پریشانی کھڑی کرنے کے علاوہ کچھ نہیں کر رہی ہے۔

خیال رہے کہ دو بین وزارتی مرکزی ٹیم جنوبی بنگال کولکاتا، ہوڑہ، شمالی 24 پرگنہ اور مشرقی اور ایک شمالی بنگال کے کالمپونگ، دارجلنگ اور جلپائی گوڑی کا دورہ کر رہی ہے۔ وزیرا علیٰ ممتا بنرجی نے کہا کہ ایک طرف مرکزی حکومت ریاستی حکومت کی تیاریوں کا جائزہ لینے کے لئے یہ ٹیم بھیجی تو دوسری طرف ریاست کو ناقص کٹس فراہم کیے گئے ہیں جس کی وجہ سے جانچ کی رفتار سست ہوئی ہے۔

اس سے قبل مرکزی ٹیم نے کولکاتا کے دو مختلف اسپتالوں کا دورہ کرنے کے بعد ریاستی حکومت کی تیاریوں اور اسپتال کے انتظامات پر سوالیہ نشان لگائے تھے۔