مودی حکومت کو لاک ڈاؤن کے ڈیڑھ ماہ بعد لوگوں کی صحت کا آیا خیال!

کورونا وائرس بحران کے درمیان مرکزی وزارت داخلہ نے پیر کو سبھی ریاستوں اور مرکز کے ماتحت علاقوں کو ہدایت جاری کی ہے کہ وہ اپنے یہاں سبھی پرائیویٹ کلینک، نرسنگ ہوم اور لیب کو کھلوانے کا انتظام کریں۔ مرکزی داخلہ سکریٹری اجے بھلّا کے ذریعہ سبھی ریاستوں کے چیف سکریٹریز اور مرکز کے ماتحت علاقوں کے افسران کو یہ حکم جاری کیا گیا ہے۔ اس میں ضرورت پڑنے پر ایک ریاست سے دوسری ریاست میں آمد و رفت کی سہولت دینے کا بھی تذکرہ ہے۔

مرکزی داخلہ سکریٹری نے زور دیا ہے کہ سبھی ریاستوں اور مرکز کے ماتحت علاقوں کو یہ یقینی کرنا چاہیے کہ ان کے علاقے کے افسران سبھی طبی پیشہ وروں، نرسوں، پیرا میڈیکل، صفائی اہلکار اور ایمبولنس کی سرگرمی شروع کرنے کی آسانی دیں۔ وزارت نے یہ حکم اس جانکاری کے بعد جاری کیا ہے کہ کئی مقامات پر اب تک پرائیویٹ کلینک اور نرسنگ ہوم کو کھولنے کی اجازت نہیں ہے۔

داخلہ سکریٹری کے خط میں کہا گیا ہے کہ "ملک کی طبی سہولت کے بنیادی ڈھانچے کو مضبوط بنانے والے یہ متبادل اسپتالوں پر بھاری تعداد میں مریضوں کے بوجھ سے راحت دیتے ہیں۔ میں سبھی ریاستوں اور مرکز کے ماتحت علاقوں سے یہ یقینی بنانے کی گزارش کروں گا کہ ایسے کلینک اور نرسنگ ہوم بغیر کسی رخنہ کے کام کرتے رہیں۔"

غور طلب ہے کہ اتوار کو کابینہ سکریٹری راجیو گابا نے سبھی ریاستوں اور مرکز کے ماتحت علاقوں کے چیف سکریٹریز اور پرنسپل سکریٹریز (صحت) کے ساتھ ایک میٹنگ بذریعہ ویڈیو کانفرنسنگ کی، جس میں طبی پیشہ وروں اور پیرامیڈیکل اہلکاروں کی آمد و رفت پر کچھ ریاستوں اور مرکز کے ماتحت علاقوں کے ذریعہ لگائی گئی پابندی کا ایشو اٹھایا گیا تھا۔ اس کے بعد ہی مرکزی داخلہ سکریٹری نے مذکورہ حکم جاری کیا ہے۔