سی بی ایس ای کے 10ویں اور 12ویں کے امتحانات آج سے شروع، طلباء کا ان ہدایات پر عمل کرنا لازمی

نئی دہلی: سنٹرل بورڈ آف سیکنڈری ایجوکیشن (سی بی ایس ای) کے 10ویں اور 12ویں کے امتحانات آج (15 فروری 2023) سے شروع ہونے جا رہے ہیں۔ سی بی ایس ای کی طرف سے جاری کردہ ڈیٹ شیٹ کے مطابق، 10ویں بورڈ کے امتحانات 21 مارچ تک، جبکہ 12ویں بورڈ کے امتحانات 5 اپریل تک جاری رہیں گے۔ امتحان کے ایڈمٹ کارڈ پہلے ہی جاری کئے جا چکے ہیں۔

سی بی ایس ای نے طلبہ و طالبات کے لیے ضروری رہنما خطوط جاری کیے ہیں جن پر عمل کرنا ضروری ہوگا۔ رہنما خطوط کے مطابق طلباء کو ایڈمٹ کارڈ پر دئے گئے وقت کے مطابق امتحانی مرکز پہنچنا ہوگا۔ امتحان صبح 10.30 بجے شروع ہوگا، اس کے لیے کو وقت سے پہلے مرکز پر پہنچنا ہوگا۔

طلباء کو امتحانی مرکز میں موبائل فون، کسی بھی قسم کے مواصلاتی آلات سمیت کوئی دوسری اشیاء لے جانے کی اجازت نہیں ہوگی۔ تاہم طلباء ایڈمٹ کارڈ اور اپنے اسکول کے شناختی کارڈ کے علاوہ امتحان کے لیے ضروری اسٹیشنری کا سامان ساتھ لے جا سکتے ہیں۔ امتحان کے آغاز پر طلبا کو سوالیہ پرچہ پڑھنے کے لیے 15 منٹ کا وقت دیا جائے گا۔

سی بی ایس ای نے کہا ہے کہ بورڈ نے 10ویں اور 12ویں کے امتحانات کو منعقد کرنے کے لیے تمام تیاریاں مکمل کر لی ہیں اور امتحانات نقل وغیرہ سے پاک ہوں گے۔ سی بی ایس ای نے کہا ہے کہ بورڈ کے امتحانات کے امیدواروں کو سوشل میڈیا پر کسی بھی قسم کی غلط معلومات یا اس طرح کے مواد کو پھیلانے سے گریز کرنا چاہیے۔ اگر کوئی امیدوار ایسا کرے گا تو اس کے خلاف سخت کارروائی کی جائے گی۔