انل دیشمکھ کی ضمانت معاملے میں سپریم کورٹ پہنچی سی بی آئی، بامبے ہائی کورٹ کے حکم کو کیا چیلنج

سی بی آئی نے بدعنوانی کے معاملے میں ملزم مہاراشٹر کے سابق وزیر داخلہ اور این سی پی لیڈر انل دیشمکھ کو ضمانت دینے کے بامبے ہائی کورٹ کے فیصلے کو سپریم کورٹ میں چیلنج پیش کیا ہے۔ بامبے ہائی کورٹ نے بارہ دسمبر کو این سی پی لیڈر انل دیشمکھ کو ضمانت دے دی تھی۔ حالانکہ عدالت نے ساتھ ہی کہا تھا کہ حکم دس دنوں کے بعد اثرانداز ہوگا۔ ایسا اس لیے کیونکہ سی بی آئی نے اسے عدالت عظمیٰ میں چیلنج پیش کرنے کے لیے وقت مانگا تھا۔

قابل ذکر ہے کہ انل دیشمکھ کو ضمانت دیتے ہوئے بامبے ہائی کورٹ نے کہا تھا کہ برخاست پولیس افسر سچن واجے کے بیان کو چھوڑ کر سی بی آئی کے ریکارڈ میں ایسے کسی بھی بیان سے یہ اشارہ نہیں ملتا ہے کہ سابق وزیر داخلہ دیشمکھ کے اشارے پر ممبئی میں بار مالکان سے اُگاہی کی گئی۔

سپریم کورٹ میں داخل اپنی عرضی میں مرکزی جانچ ایجنسی نے دعویٰ کیا ہے کہ سی بی آئی کے اعتراضات کے باوجود ہائی کورٹ نے دیشمکھ کو ضمانت دینے وقت سنگین غلطیاں کی ہیں۔ سی بی آئی نے کہا ہے کہ ہائی کورٹ نے اس بات پر غور نہیں کیا کہ معاشی جرائم الگ درجہ میں آتے ہیں اور ایسے جرائم میں مستقل معاملے کی طرح ضمانت دیے جانے کی ضرورت نہیں، خصوصاً ایسے وقت میں جب معاشی جرائم کی جڑیں مضبوط ہیں۔