ارون گپتا کے گھر پر چھاپہ، ستیندر جین کے تین لیپ ٹاپ برآمد

دہلی کے وزیر صحت ستیندر جین کی پریشانیاں بڑھ سکتی ہیں کیونکہ آج صبح ستیندر جین کے بچپن کے دوست ارون گپتا کے گھر پر سی بی آئی نے چھاپہ مارا اور ذرائع کے مطابق وہاں سے چار ہارڈ ڈسک اور تین لیپ ٹاپ برآمد کئے گئے ہیں اور ان کے بارے میں رپورٹ ہے کہ وہ ستیندر جین کے ہیں ۔ ارو ن گپتا کے گھر پر چھاپہ دہلی ڈینٹل کاؤنسل کے رجسٹرار رشی راج کی نشاندہی پر مارا گیا ہے ۔

واضح رہے دو دن قبل دہلی ڈینٹل کاؤنسل کے رجسٹرار رشی راج اور ان کے وکیل کو چار لاکھ سے زیادہ رشوت لینے کے الزام میں سی بی آئی نے گرفتار کیا تھا اور گرفتاری کے بعد سی بی آئی نے چار دن کی ریمانڈ پر ان کو لے لیا تھا۔ارون گپتا ستیندر جین کے دوست ہیں اور دہلی حکومت نے ان کو ’دہلی میڈیکل کاؤنسل‘ کا چئیرمین نامزد کیا تھا ۔ ارون گپتا عام آدمی پارٹی ، شکور بستی کے صدر ہیں جہاں سے ستیندر جین رکن اسمبلی ہیں۔ ارون گپتا کی اہلیہ کو وزیر تعلیم منیش سسودیا نے محکمہ تعلیم میں ڈسٹرکٹ کوآرڈینیٹر بھی بنایا ہوا ہے۔