ویاپم معاملہ: فرد جرم داخل، بی جے پی سے منسلک کئی لوگوں کا نام شامل

مدھیہ پردیش کے مشہور ویاپم گھوٹالہ کی جانچ کر رہی سی بی آئی نے 23 نومبر کو 592 ملزمین کے خلاف عدالت میں فرد جرم پیش کر دی ہے۔ یہ معاملہ سال 2012 میں پی ایم ٹی امتحان میں ہوئی بے ضابطگی سے جڑا ہوا ہے۔ اس معاملے میں جنھیں ملزم بنایا گیا ہے ان میں کئی رسوخ والے لوگ شامل ہیں۔ ہزاروں کروڑ روپے کے اس گھوٹالے میں شیوراج حکومت میں اعلیٰ تعلیم کے وزیر رہ چکے لکشمی کانت شرما اور ویاپم کے سابق کنٹرولر پنکج ترویدی سمیت کئی بی جے پی لیڈر جیل جا چکے ہیں۔ اب تک ویاپم گھوٹالہ سے منسلک 48 لوگوں کی موت بھی ہو چکی ہے۔

معاملے کا پردہ فاش کرنے والوں میں شامل ڈاکٹر آنند رائے نے بتایا کہ سی بی آئی کی جانب سے 23 نومبر کو خصوصی جج ڈی پی مشرا کی عدالت میں سال 2012 کی پی ایم ٹی امتحان میں ہوئے گھوٹالے کو لے کر فرد جرم پیش کی۔ تقریباً 1500 صفحات کے فرد جرم میں 592 لوگوں کو ملزم بنایا گیا ہے۔

ڈاکٹر رائے کا کہنا ہے کہ جن بڑے لوگوں کے نام اس میں آئے ہیں انھوں نے عدالت میں پیشگی ضمانت کی عرضی بھی داخل کی ہے۔ اب تک 245 ملزمین کو نوٹس بھیجا جا چکا ہے۔ سی بی آئی کے فرد جرم میں یہ بات بھی سامنے آئی ہے کہ پرائیویٹ میڈیکل کالجوں میں ایم بی بی ایس میں داخلے کے عوض 80 لاکھ اورپوسٹ گریجویشن کے لیے ایک کروڑ روپے تک سے زیادہ کی رقم لی گئی ہے۔

شیوراج حکومت میں اعلیٰ تعلیم کے وزیر رہے لکشمی کانت شرما، ان کے او ایس ڈی او پی شکلا، بی جے پی لیڈر کے ایک قریبی سدھیر شرما، ویاپم کے سابق کنٹرولر پنکج ترویدی، ویاپم کے کمپیوٹر انالسٹ نتن مہندر، گھوٹالے کے سرغنہ ڈاکٹر جگدیش ساگر جیل جا چکے ہیں۔ ان میں سے اب کئی ضمانت پر ہیں۔

یہ معاملہ 9 جولائی 2015 کو سی بی آئی کو سپرد کیے جانے سے قبل اس کی جانچ کر رہی ایس ٹی ایف نے ویاپم گھوٹالہ میں کل 55 معاملے درج کیے گئے تھے۔ جولائی 2013 میں یہ معاملہ سامنے آنے کے بعد اس کی جانچ کا ذمہ اگست 2013 میں ایس ٹی ایف کے سپرد کیا گیا تھا۔ پھر ہائی کورٹ نے اس معاملے کا نوٹس لیتے ہوئے سابق جج چندرش بھوشن کی صدارت میں اپریل 2014 میں ایس آئی ٹی بنائی جس کی نگرانی میں ایس ٹی ایف جانچ کر رہی تھی۔ اب معاملہ سی بی آئی کے پاس ہے۔

اس گھوٹالے کو کانگریس پارٹی ’مہا گھوٹالہ‘ کہتی ہے اور جانچ کے دوران جانچ افسران سمیت 48 لوگوں کی موت ہونے کے سبب وزیر اعلیٰ شیو راج کو ’شَو راج‘ کا نام دے چکی ہے۔ حزب مخالف پارٹی کا کہنا ہے کہ بدعنوانی میں ڈوبے بی جے پی لیڈران ملک کو بدعنوانی سے پاک کرنے کا صرف جملہ استعمال کر رہے ہیں۔