آسام: گوہاٹی میں المناک سڑک حادثہ، 7 طلبہ ہلاک، متعدد زخمی

آسام کے گوہاٹی سے ایک خوفناک سڑک حادثہ پیش آیا ہے۔ معلومات کے مطابق، گوہاٹی کے جلکباری علاقے میں دیر رات ایک خوفناک سڑک حادثے میں سات لوگوں کی موت ہو گئی۔ بتایا جا رہا ہے کہ اس سڑک حادثے میں کئی لوگ زخمی بھی ہوئے ہیں، جنہیں قریبی اسپتال میں داخل کرایا گیا ہے۔

سڑک حادثہ کے وقت اسکارپیو کار میں دس افراد سوار تھے۔ ان میں سے سات طالب علموں کی موقع پر ہی موت ہو گئی، جبکہ تین کو تشویشناک حالت میں گوہاٹی میڈیکل کالج اینڈ اسپتال (جی ایم سی ایچ) لے جایا گیا۔ واقعے کے فوری بعد پولیس وہاں پہنچ گئی تھی تاہم طالب علموں کی جان نہ بچائی جاسکی۔

سڑک حادثے کے بارے میں جانکاری دیتے ہوئے گوہاٹی کے جوائنٹ پولیس کمشنر وجے کمار نے کہا کہ ابتدائی تحقیقات کی بنیاد پر پتہ چلا ہے کہ حادثے میں مرنے والے سبھی طالب علم ہیں۔ یہ حادثہ جالکباری علاقے میں پیش آیا۔ یہ طلباء اسکارپیو کار میں سفر کر رہے تھے۔ سڑک حادثہ اسکارپیو کار کے ڈرائیور کا گاڑی پر سے کنٹرول کھونے کے بعد پیش آیا۔ جس کے بعد اسکارپیو جالکباری فلائی اوور روڈ پر کھڑی بولیرو ڈی آئی پک اپ وین سے ٹکرانے کے بعد ڈیوائیڈر سے جا ٹکرائی۔