انتخابی کمیشن مودی کی نامزدگی خارج کرے: ترنمول

نئی دہلی: ترنمول کانگریس نے وزیراعظم نریندرمودی پر لوک سبھا انتخابات کے بعد حکومت بنانے کے لئے عوامی نمائندوں کے خرید و فروخت سے متعلق بیان دینے کا الزام لگاتے ہوئے ان پر ضابطہ اخلاق کی خلاف ورزی کرنے کی شکایت انتخابی کمیشن سے کی ہے اور اس بنیاد پر ان کی نامزدگی خارج کرنے کا مطالبہ کیا ہے۔ ترنمول کانگریس نے پیر کی شام سات بجے چیف الیکشن کمشنر سنیل اروڑا کو خط لکھ کر یہ مطالبہ کیا۔

راجیہ سبھا میں ترنمول کے لیڈر ڈیرک اوبرائن نے اروڑا کو لکھے اپنے خط میں کہا ہے کہ مودی نے کل مغربی بنگال میں انتخابی تشہیر کے دوران یہ کہا تھا کہ ترنمول کے 40 رکن اسمبلی ان کے رابطے میں ہیں اور لوک سبھا انتخابات کے نتیجے آنے کے بعد وہ بی جے پی میں شامل ہو جائیں گے۔ ترنمول لیڈر نے خط میں لکھا ہے کہ مودی نے یہ بیان دے کر ووٹروں کو متاثر کرنے کی کوشش کی ہے اور ان کا یہ بیان حکومت بنانے میں عوامی نمائندوں کی خرید فروخت کی سمت اشارہ کرتا ہے۔

اوبرائن نے کہا ہے کہ مودی کا یہ بیان انتخابی ضابطہ اخلاق کی کھلی خلاف ورزی ہے اور وہ پہلے بھی پلوامہ کے شہیدوں کے نام پر ووٹ مانگ کر ضابطہ اخلاق کی خلاف ورزی کر چکے ہیں۔ انہوں نے کہا کہ بھارتیہ جنتا پارٹی (بی جےپی) نے کبھی بایوپک تو کبھی ویب سیریز تو کبھی فوج کا ذکر کرکے لوگوں کو متاثر کرنے کی کوشش کی لیکن جب وہ ناکام ہوگئی تو وہ اب خرید فروخت کے بارے میں بیان دے کر ووٹروں کو اپنے حق میں متوجہ کرنے کی کوشش کر رہی ہے۔

ترنمول کانگریس نے کمیشن سے کہا ہے کہ وہ مودی سے کہے کہ ترنمول کے 40 اراکان اسمبلی کے رابطے میں ہونے کے سلسلے میں کوئی ثبوت دیں ورنہ انتخابی ضابطہ اخلاق کی خلاف ورزی کے معاملے میں ان کی نامزدگی خارج کی جائے۔