طلاق ثلاثہ بل کو مودی کابینہ سے منظوری، پرسنل لا بورڈ کا اجلاس طلب

پارلیمنٹ کا سرمائی اجلاس کا آغاز ہو چکا ہے جس کے دوران مودی حکومت نے کئی زیر التوا بلوں کو پاس کرانے کا ہدف رکھا ہے۔ مودی کابینہ نے جمعہ کو طلاق ثلاثہ پر غیر ضمانتی بل کو پارلیمنٹ میں پیش کرنے کے لئے منظوری دے دی ہے۔ ایک ہی نشست میں تین طلاق دینے پر سزا پر مبنی اس بل کو اگلے ہفتہ پارلیمنٹ کے سرمائی اجلاس میں پیش کیا جا سکتا ہے ۔

حکومت مجوزہ بل کو ’دی مسلم ویمن پروٹیکشن آف رائٹس ان میرج ایکٹ ‘ کے نام سے لا رہی ہے جو کہ صرف اور صرف طلاق ثلاثہ یا طلاق بدعت پر نافذ ہوگا۔ اس قانون کو منظوری مل جانے کے بعد اگر مسلم شوہر اپنی منکوحہ کو ایک ہی نشست میں تین طلاق دیتا ہے وہ غیر قانونی عمل ہوگا۔ رواں سال کی 22 اگست کو سپریم کورٹ نے ایک ہی نشست میں تین طلاق دینے کو غیر قانونی قرار دے دیا تھا اور مرکزی حکومت سے اس پر قانون سازی کو کہا تھا۔

بی جے پی نے کافی دنوں سے مسلم خواتین کے مسائل کو اپنے ایجنڈے میں شامل کیا ہوا ہے اور اکثر اس کے کئی رہنما اس معاملہ پر بیان بازی بھی کرتے رہتے ہیں۔ سپریم کورٹ نے جیسے ہی یہ فیصلہ سنایا مودی حکومت نے فوری طور پر بل پر کام کرنا شروع کر دیا اور یکم دسمبر کو ایک خاکہ تیار کر کے ریاستی حکومتوں سے اس پر رائے طلب کی۔ سب سے پہلے اتر پردیش حکومت نے مرکز کے اس بل کو منظور ی دی ۔ مرکزی حکومت کے مطابق بل کو اترپردیش کے ساتھ ساتھ جھارکھنڈ، آسام، مدھیہ پردیش، مہاراشٹر اور منی پور وغیرہ ریاستوں نے بھی حمایت دی ہے۔

واضح رہے کہ مرکزی حکومت کے مجوزہ بل کے مطابق ایک ہی نشست میں زبانی، تحریری یا پھر میسج یا ای میل کے ذریعہ سے دی جانے والی طلاق غیر قانونی ہوگی اور جوبھی شخص اس طرح سے طلاق دے گا اس کو تین سال کی سزا کے ساتھ جرمانہ بھی ہو سکتا ہے۔ یعنی ایک ہی نشست میں تین طلاق دینا اب غیر ضمانتی اور سنجیدہ جرائم کے زمرے میں شامل ہوگا۔

ادھر، آل انڈیا مسلم پرسنل لابورڈ کے ترجمان اور مشہور عالم دین مولانا خلیل الرحمان سجاد نعمانی کا کہنا ہے کہ مرکزی حکومت کے تین طلاق کے مسئلے پر پیش کرنے والے مجوزہ بل پرغور وخوض کے لئے مسلم پرسنل لا بورڈ کی مسلم جماعتوں کے ساتھ17دسمبر کو دہلی میں میٹنگ بلائی گئی ہے۔

انہوں نے کہاکہ مسلم پرسنل لابورڈ حکومت کے تین طلاق کے مسئلے پر اٹھائےقدم سے واقف ہے اور اس مسئلہ پر غور کو خوض کرنے کے لئے تمام مسلم جماعتوں کو دعوت دی گئی ہے تاکہ اس معاملے پر تمام مسلم جماعت کے سربراہان سر جوڑ کر اس حساس موضوع پر سنجیدگی سے بات چیت کرسکیں۔

انہوں نے کہاکہ میڈیا کے حوالے سے یہ بات معلوم ہوئی ہے کہ وزارتی گروپ نے تین طلاق کو ختم کرنے پر گزشتہ ماہ غور و خوض کیا تھا اور اس کے لئے حکومت پارلیمنٹ کے سرما ئی اجلاس میں ایک بل پیش کرنے جارہی ہے۔

مولانا نعمانی نے کہاکہ اس مجوز ہ بل کو دیکھنے کے بعد ہی اس پر کوئی رائے دی جاسکتی ہے اور مسلم پرسنل لا بورڈ دیگر مسلم جماعتوں کے ساتھ مل کر جو فیصلہ کرے گا وہی ہمارے لئے اہم ہوگا۔