4 ریاستوں میں راجیہ سبھا کی 6 خالی سیٹوں کے لیے ضمنی انتخاب کا اعلان، 20 دسمبر کو ہوگی ووٹنگ

راجیہ سبھا میں 4 ریاستوں کی خالی 6 سیٹوں پر ضمنی انتخاب کرانے کا آج الیکشن کمیشن نے باضابطہ اعلان کر دیا۔ جاری نوٹیفکیشن کے مطابق ان سبھی سیٹوں پر 20 دسمبر کو ووٹنگ ہوگی۔ جن ریاستوں کی خالی سیٹوں پر ضمنی انتخاب ہونا ہے، وہ ریاستیں ہیں آندھرا پردیش، اڈیشہ، مغربی بنگال اور ہریانہ۔

آندھرا پردیش میں راجیہ سبھا کی 3 سیٹیں تب خالی ہوئی تھیں جب وائی ایس آر کانگریس کے اراکین وینکٹ رمن راؤ موپی دیوی، بیڑا مستان راؤ یادو اور ریاگا کرشنیّا نے اگست میں ایوان بالا کی رکنیت سے استعفیٰ دے دیا تھا۔ راجیہ سبھا رکن کی شکل میں یادو اور کرشنیّا کی مدت کار 21 جون 2028 کو ختم ہونی تھی، جبکہ موپی دیوی کو 21 جون 2026 میں سبکدوش ہونا تھا۔

اڈیشہ میں راجیہ سبھا کی ایک سیٹ اس وقت خالی ہوئی تھی جب سجیت کمار نے استعفیٰ دے دیا تھا۔ اس کے بعد انھیں بی جے ڈی کے ذریعہ معطل کر دیا گیا تھا۔ ان کی مدت کار 2 اپریل 2026 کو ختم ہونی تھی۔ مغربی بنگال کی بات کی جائے تو ترنمول کانگریس کے جواہر سرکار نے کولکاتا میں ایک زیر تربیت خاتون ڈاکٹر کے ساتھ عصمت دری اور قتل معاملہ کے بعد اپریل ماہ میں استعفیٰ دیا تھا۔ وہ اپریل 2026 میں سبکدوش ہونے والے تھے۔ اسی طرح بی جے پی کے کرشن لال پنوار نے حال ہی میں ہوئے اسمبلی انتخاب میں رکن اسمبلی منتخب ہونے کے بعد ہریانہ سے راجیہ سبھا کی اپنی سیٹ چھوڑ دی تھی۔