بی ایس پی لیڈر کو پارٹی کے دفتر میں دفن نہیں کیا جا سکتا: مدراس ہائی کورٹ
مایاوتی کی جماعت بی ایس پی کے تمل ناڈو سربراہ کے آرمسٹرانگ کا قتل کر دیا گیا تھا، مدراس ہائی کورٹ نے ان کو کو پارٹی دفتر میں دفنانے کا مطالبہ مسترد کر دیا
![<div class="paragraphs"><p>مقتول آرمسٹرانگ / آئی اے این ایس</p></div>](https://media.assettype.com/qaumiawaz%2F2024-07%2Ff27d064b-228f-461e-9d4e-ee8eae75c849%2Farmstrong.jpg?rect=0%2C25%2C4000%2C2250&auto=format%2Ccompress&fmt=webp)
مقتول آرمسٹرانگ / آئی اے این ایس
چنئی: مدراس ہائی کورٹ نے ڈی ایم کے حکومت کے موقف کو برقرار رکھتے ہوئے تمل ناڈو بی ایس پی کے سربراہ کے آرمسٹرانگ کو ریاستی راجدھانی میں واقع پارٹی دفتر میں دفن کرنے کی درخواست کو مسترد کر دیا۔ خیال رہے کہ آرمسٹرانگ کو جمعہ کو چنئی میں ان کے گھر کے قریب قتل کر دیا گیا تھا۔
عدالت نے کہا کہ کی آرمسٹرانگ کو قریبی ضلع تھروولوور میں ایک ایکڑ پرائیویٹ پلاٹ میں دفنایا جا سکتا ہے۔ عدالت نے کہا کہ بی ایس پی کے حامیوں کی طرف سے آخری رسومات پرامن طریقے سے ادا کی جائیں۔
دریں اثنا، مدراس ہائی کورٹ نے مشورہ دیا کہ بی ایس پی تمل ناڈو یونٹ کے صدر کے آرمسٹرانگ کو گریٹر چنئی کارپوریشن (جی سی سی) کی طرف سے شناخت کردہ 3 مقامات میں سے کسی ایک پر دفن کیا جا سکتا ہے۔ آرمسٹرانگ کی اہلیہ پورکوڈی کی جانب سے پیرمبور میں بی ایس پی پارٹی کے دفتر میں میت کو دفنانے کی اجازت مانگنے والی ایک فوری درخواست کی سماعت کرتے ہوئے جسٹس وی بھوانی سبارویان نے کہا کہ چونکہ بی ایس پی کا دفتر ایک گنجان آبادی والے اور تنگ علاقے میں واقع ہے، اس لیے ان کی لاش کو جی سی سی کی طرف سے شناخت کردہ تین متبادل مقامات میں سے کسی ایک میں دفن کیا جا سکتا ہے۔ جی سی سی نے ان جگہوں کو اس بات کو ذہن میں رکھتے ہوئے نشان زد کیا ہے کہ بی ایس پی لیڈر کی آخری رسومات میں بڑی تعداد میں لوگ شامل ہو سکتے ہیں۔
جج نے آرمسٹرانگ کی لاش کو پارٹی دفتر کے احاطے میں دفنانے اور وہاں قبر بنانے کی اجازت مانگنے والی ایک درخواست پر خصوصی سماعت کرتے ہوئے کہا کہ بی ایس پی لیڈر کی لاش کو مناسب رابطہ سڑکوں کے ساتھ بہتر جگہ پر منتقل کیا جا سکتا ہے۔
جج نے کہا، ’’پارٹی آفس کے احاطے میں تدفین کی اجازت دینا ممکن نہیں ہوگا کیونکہ یہ ایک تنگ رسائی سڑک کے ساتھ رہائشی علاقے میں واقع ہے اور پارٹی دفتر کی زمین صرف 2,400 مربع فٹ ہے جس میں ایک اسٹرکچر پہلے سے ہی موجود ہے۔‘‘
درخواست گزار کے اس استدلال پر کہ شہری حکام نے اداکار سیاست دان اور ڈی ایم ڈی کے کے بانی وجے کانت کی لاش کو ان کے پارٹی دفتر میں دفن کرنے کی اجازت دی تھی، ایڈیشنل ایڈوکیٹ جنرل جے رویندرن نے کہا، یہ ایک بہت بڑی زمین تھی۔ رویندرن نے کہا "ہمارے پاس دل ہے، لیکن ہمارے ہاتھ بندھے ہوئے ہیں،" ۔
جی سی سی کمشنر نے ایک حکم جاری کیا ہے جس میں اجازت دینے سے انکار کیا گیا ہے کہ آرمسٹرانگ کی لاش کو بی ایس پی پارٹی کے احاطے میں دفن نہیں کیا جائے گا کیونکہ یہ ایک تنگ سڑک پر اور ایک گنجان آباد رہائشی علاقے میں واقع ہے۔
اے اے جی نے کہا، "ریاستی حکومت نے تین متبادل جگہوں کی نشاندہی کی ہے جہاں میت کو دفن کیا جا سکتا ہے اور ان میں سے ایک 2,000 مربع فٹ پر پھیلا ہوا ہے جو اس جگہ سے صرف 1.5 کلومیٹر دور ہے جہاں درخواست گزار انہیں دفن کرنا چاہتا ہے۔"
جسٹس نے کہا، "چونکہ آرمسٹرانگ کے بہت سے پیروکار ان کی تعزیت کے لیے جمع ہو سکتے ہیں، اس لیے اتر پردیش میں ہاتھرس بھگدڑ جیسی صورتحال پیدا نہیں کی جانی چاہیے۔" اسی وجہ سے میت کو مناسب جگہ پر دفنانے کا مشورہ دیا گیا ہے۔
جج نے کہا کہ درخواست گزار حکومت کی تجویز کو قبول کر سکتا ہے اور موجودہ متبادل جگہوں میں سے کسی ایک میں لاش کو دفن کر سکتا ہے اور پھر مناسب رابطہ سڑکوں کے ساتھ اچھی جائیداد خریدنے کے بعد لاش کو دوسرے بہتر مقام پر منتقل بھی کیا جا سکتا ہے۔
(یو این آئی ان پٹ کے ساتھ)
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔