براڈ بینڈ خدمات پیر کی شام تک بحال ہوں گی: بی ایس این ایل ذرائع

سری نگر: وادی کشمیر میں سرکاری مواصلاتی کمپنی بھارت سنچار نگم لمیٹڈ (بی ایس این ایل) کی 7 ماہ سے بند براڈ بینڈ خدمات امکانی طور پر پیر کی شام تک بحال ہوں گی کیونکہ کمپنی کی طرف سے نصب کردہ فائر وال کی ٹیسٹنگ آخری مرحلے میں ہے۔

بی ایس این ایل ذرائع نے یو این آئی اردو کو بتایا کہ وادی میں براڈ بینڈ خدمات کو پیر کی شام تک بحال کیا جائے گا کیونکہ صارفین کی سماجی رابطوں کی ویب سائٹس تک رسائی کو روکنے کے لئے نصب کردہ فائر وال کی ٹیسٹنگ اپنے آخری مرحلے میں ہے۔ انہوں نے مزید کہا کہ صارفین صرف وائٹ لسٹڈ ویب سائٹ تک ہی رسائی حاصل کرپائیں گے۔

بتادیں کہ جموں کشمیر انتظامیہ نے 24 جنوری کو وادی میں ٹو جی موبائل انٹرنیٹ اور براڈ بینڈ انٹرنیٹ سروس بحال کرنے کے لئے حکم نامہ جاری کیا تھا جس کے چلتے اگرچہ نجی انٹرنیٹ سروس پرووائیڈرس نے براڈ بینڈ سروس بحال کی تاہم بی ایس این ایل زائد از ایک ماہ بیت جانے کے باوجود بھی سروس بحال کرنے میں ناکام ثابت ہوئی۔

بی ایس این ایل کی براڈ بینڈ انٹرنیٹ خدمات بحال کرنے میں ناکامی سے جہاں اس کے صارفین شدید پریشان ہیں وہیں وہ نجی انٹرنیٹ سروس پرووائیڈرس کی طرف رجوع کرنے پر مجبور ہورہے ہیں۔ متذکرہ کمپنی کے صارفین کا الزام ہے کہ براڈ بینڈ گزشتہ سات ماہ سے معطل ہونے کے باجود بھی ان سے باقاعدہ بل وصولی جاتی ہے۔

کمپنی کے صارفین کے ایک گروپ نے یو این آئی اردو کو بتایا: 'سرکار کی طرف سے حکمنامے کے باوجود بھی بی ایس این ایل نے براڈ بینڈ سروس بحال نہیں کی ہے جس کے باعث ہم گوناگوں مشکلات سے دوچار ہورہے ہیں'۔ ایک صارف نے کہا کہ ہم نجی انٹرنیٹ سروس پرووائیڈرس کی طرف رجوع کرنے پر مجبور ہورہے ہیں۔ ان کا کہنا تھا: 'ہم اب نجی انٹرنیٹ سروس پرووائیڈرس کی طرف رجوع کرنے پر مجبور ہورہے ہیں، آخر ہم کب تک انتظار کریں گے، ہمیں مشکلات درپیش ہیں'۔

بعض صارفین کا کہنا ہے کہ گزشتہ سات ماہ سے براڈ بینڈ سروس معطل ہونے کے باوجود بھی ان سے باقاعدہ بل وصولی جاتی ہے۔ انہوں نے کہا کہ بی ایس این ایل کا سست طریقہ کار صارفین کو دوسری نجی کمپنیوں کی طرف رجوع کرنے پر مجبور کررہا ہے جو حق بجانب ہے۔ اس سے کمپنی کا مالی بحران مزید سنگین ہوگا۔

ادھر وادی میں صارفین ٹو جی موبائل انٹرنیٹ کی بحالی سے ناخوش اور نالاں ہیں۔ صارفین کا کہنا ہے کہ ٹو جی انٹرنیٹ موبائل کی بحالی برائے نام ہے۔ انہوں نے کہا کہ اس سے ای میل نہیں کیا جاسکتا ہے کوئی فائل ڈاون لوڈ کرنے کی بات ہی نہیں ہے۔