کردار پر شک ہوا تو لڑکے نے اپنی  10سال پرانی گرل فرینڈ کو گولی مار دی!

پونے کے ایک ہوٹل میں ایک آئی ٹی پروفیشنل کو اس کے عاشق نے مبینہ طور پر گولی مار کر ہلاک کر دیا۔ پولیس نے اتوار کو بتایا کہ یہ واقعہ ہفتہ کو پمپری چنچواڑ کے ہنجے واڑی علاقے میں واقع اویو ٹاؤن ہاؤس ہوٹل میں پیش آیا۔ پولیس نے بتایا کہ ملزم رشبھ نگم کو ممبئی سے گرفتار کر لیا گیا ہے۔

نیوز پورٹل ’آج تک‘ پر شائع خبر کے مطابق پولیس ذرائع نے انڈیا ٹوڈے کو بتایا کہ وندنا دویدی نامی یہ خاتون ہنجے واڑی میں ایک مشہور آئی ٹی فرم میں کام کرتی تھی اور رشبھ نگم لکھنؤ، اتر پردیش کا رہنے والا ہے۔ پولیس کا کہنا ہے کہ دونوں ایک دوسرے کو گزشتہ 10 سال سے جانتے تھے اور آپس میں تعلقات تھے۔ رشبھ وندنا سے ملنے پونے آیا تھا۔

ان دونوں نے ہنجے واڑی میں ایک ہوٹل بک کیا تھا، جہاں وہ 25 جنوری سے مقیم تھے۔ پولیس ذرائع کے مطابق رشبھ وندنا کو قتل کرنے کا منصوبہ بنا کر پونے آیا تھا۔ کیونکہ اسے اس کے کردار پر شک تھا۔ سی سی ٹی وی فوٹیج میں رشبھ کو وندنا کو مبینہ طور پر گولی مارنے کے بعد ہفتہ کی رات تقریباً 10 بجے ہوٹل کے کمرے سے نکلتے ہوئے دیکھا گیا تھا۔

مبینہ قتل کے بعد رشبھ ممبئی بھاگ گیا جہاں اسے گرفتار کر لیا گیا۔ پولیس نے ہوٹل کے کمرے کو سیل کر دیا ہے جہاں سے وندنا کی لاش ملی تھی۔ اور اس بات کی تحقیقات کر رہی ہے کہ رشبھ کو بندوق کہاں سے ملی تھی جس کا استعمال اس نے مبینہ طور پر اپنی گرل فرینڈ کو مارنے کے لیے کیا تھا۔

پونے کے اے سی پی وشال ہیرے نے بتایا کہ اتوار کی صبح اطلاع ملی تھی کہ ہنجے واڑی کے لکشمی چوک میں فائرنگ ہوئی ہے۔ پولیس جب موقع پر پہنچی تو ہوٹل اویو ٹاؤن ہاؤس کے کمرہ نمبر 306 میں فائرنگ کی اطلاع سامنے آئی، جب پولیس کمرے میں گئی تو انہیں وندنا دویدی کی لاش ملی۔ ہوٹل کی بکنگ کے دوران سی سی ٹی وی فوٹیج اور رجسٹریشن سے پتہ چلا کہ رشبھ نگم نامی نوجوان 25 جنوری سے ہوٹل کے کمرہ نمبر 306 میں وندنا کے ساتھ رہ رہا تھا۔ اس سلسلے میں مزید کارروائی کی جا رہی ہے۔