بنگلورو میں تین اہم ہوٹلوں کو بم سے اڑانے کی دھمکی، پولیس ہائی الرٹ
دھمکی ملنے کے بعد بنگلورو پولیس نے تینوں ہوٹلوں میں سیکورٹی بڑھا دی ہے۔ بم اسکواڈ اور پولیس کی کئی ٹیمیں بھی موقع پر موجود ہیں اور پورے معاملے کی جانچ کی جا رہی ہے۔
![<div class="paragraphs"><p>تصویر/ اے این آئی</p></div>](https://media.assettype.com/qaumiawaz%2F2024-05%2Ff7e4c817-6f59-4493-bc21-caef24d658dd%2FScreenshot_2024_05_23_140520.png?rect=0%2C0%2C672%2C378&auto=format%2Ccompress&fmt=webp)
تصویر/ اے این آئی
کرناٹک کے بنگلورو شہر میں تین ہوٹلوں کو بم سے اڑانے کی دھمکی ملی ہے۔ یہ دھمکی جمعرات (23 مئی) کو ایک ای میل کے ذریعے دی گئی ہے، جس کے بعد پولیس نے تینوں ہوٹلوں میں سیکوریٹی بڑھا دی ہے۔ اس کے علاوہ بم اسکواڈ اور پولیس کی کئی ٹیمیوں کو تعینات کیا گیا ہے جبکہ شہر کی پولیس کو الرٹ کر دیا گیا ہے۔
معلومات کے مطابق یہ دھمکی بھرا ای میل شہر کے ’دی اوٹرس‘ سمیت تین معروف ہوٹلوں کو موصول ہوا ہے۔ اس کی اطلاع ملتے ہی بم اسکواڈ اور پولیس کی ٹیمیں تینوں ہوٹلوں پر پہنچ گئیں۔ جنوبی مشرقی بنگلورو کے ڈی سی پی کے مطابق اطلاع ملتے ہی پولیس حرکت میں آگئی اور بم اسکواڈ کے ساتھ ایک ٹیم کو تینوں ہوٹلوں میں بھیج دیا گیا۔ فی الحال ٹیم موقع پر پہنچ کر تحقیقات کر رہی ہے۔ آس پاس کے علاقوں میں بھی سیکورٹی بڑھا دی گئی ہے۔ اس سے ایک دن قبل نارتھ بلاک میں واقع وزارت داخلہ کو بھی بم کی دھمکی کا ای میل موصول ہوا تھا۔ تاہم بعد میں یہ افواہ ثابت ہوئی۔
اس سے قبل 14 مئی کو بنگلورو کے 8 پرائیویٹ اسکولوں کو بھی بم کی دھمکیاں ملی تھیں۔ تفتیش کے دوران یہ محض افواہ ثابت ہوئی۔ اس کے باوجود پولیس نے اسکولوں کے ارد گرد سیکورٹی بڑھا دی تھی۔ واضح رہے کہ اس سے قبل اپریل 2024 میں دہلی-این سی آر، جے پور ، احمد آباد و اتر پردیش اور بنگلور کے کئی اسکولوں کو بم کی دھمکیوں والی ای میل بھیجی گئی تھیں، اس سے کافی خوف وہراس پھیل گیا تھا۔ بعد میں یہ تمام دھمکیاں بھی افواہیں ثابت ہوئیں تھیں۔ اس دھمکی کے بعد دہلی پولیس الرٹ موڈ پر ہے اور اس نے حفاظتی انتظامات بڑھا دیے ہیں۔ دہلی پولیس نے 17 مئی کو دہلی ہائی کورٹ میں ایک رپورٹ پیش کی جس میں اس نے شہر بھر میں پانچ بم ڈسپوزل اسکواڈ اور 18 بم ڈیٹکشن ٹیمیوں کی تعیناتی کی اطلاع دی تھی۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔