جمنا ندی میں کشتی الٹنے کا حادثہ، مزید آٹھ لوگوں کی لاشیں برآمد، مرنے والوں کی تعداد 11 ہوگئی

باندہ: اتر پردیش میں ضلع باندہ کے مارکا تھانہ علاقے میں دو روز قبل جمنا ندی میں کشتی الٹنے کے حادثے میں مزید آٹھ لوگوں کی لاشیں برآمد ہوئی ہیں۔ اس کے ساتھ ہی اس حادثے میں مرنے والوں کی کل تعداد 11 ہو گئی ہے، پولس نے ہفتہ کے روز یہ اطلاع دی۔ پولیس کا دعویٰ ہے کہ کشتی الٹنے کے بعد 04 افراد تاحال لاپتہ ہیں۔

باندہ کے پولس سپرنٹنڈنٹ ابھینندن نے ہفتہ کے روز بتایا کہ 32 مسافروں کو لے کر فتح پور ضلع کی سرحد سے باندہ ضلع کے مارکا تھانہ علاقے میں مارکا گاؤں کی طرف آنے والی کشتی جمعرات کے روز جمنا ندی میں ڈوب گئی۔ جن میں سے 17 افراد کو بچا لیا گیا ہے۔ حادثے کے بعد 03 لاشیں نکال لی گئی تھیں۔ ان میں دو خواتین اور ایک بچہ بھی شامل تھا۔

اس کے بعد سے جاری ریسکیو آپریشن کے دوران غوطہ خوروں نے ہفتے کے روز مزید آٹھ لاشیں نکالیں۔ جس کے بعد اس حادثے میں مرنے والوں کی تعداد 11 ہو گئی۔ 4 دیگر کی تلاش جاری ہے۔ انہوں نے کہا کہ کشتی میں سوار افراد کی چھان بین کی جا رہی ہے۔ این ڈی آر ایف، ایس ڈی آر ایف واٹر پولیس اور مقامی پولیس اور غوطہ خوروں کی مدد سے جمنا ندی میں لاپتہ افراد کی تلاش جاری ہے۔