بی جے پی نے لوک سبھا انتخابات میں کامیابی دھوکہ سے حاصل کی :ممتا بنرجی

کولکاتا: وزیر اعلیٰ ممتا بنرجی نے ترنمول کانگریس کی سالانہ ریلی ”شہید دیوس“ میں بی جے پی کی سخت تنقید کرتے ہوئے کہا کہ ”دھوکہ دہی“ کرکے لوک سبھاانتخابات میں کامیابی حاصل کی گئی ہے۔ ممتا بنرجی نے کہا کہ بی جے پی نے ای وی ایم مشین، سی آر پی ایف اور الیکشن کمیشن کی مدد سے بنگال میں 18 سیٹوں پر کامیابی حاصل کی ہے۔ ممتا بنرجی نے کہا کہ اب بی جے پی ترنمول کانگریس کے دفاتر اور عوام پر قبضہ کرنا چاہتی ہے مگر آج کی ریلی میں انسانوں کا مارتا ہوا سیلاب اس بات کا ثبوت ہے کہ عوام ہمارے ساتھ ہیں۔

خیال رہے کہ 2014 میں محض 2 سیٹیوں پر کامیابی حاصل کرنے والی بی جے پی نے 18سیٹوں پر کامیابی حاصل کی ہے۔ جب کہ ترنمول کانگریس کے ممبران پارلیمنٹ کی تعداد 34 سے گھٹ کر 22 ہوگئی۔ شہید دیوس کی ریلی سے خطاب کرتے ہوئے ممتا بنرجی نے کہا کہ بی جے پی کی قیادت والی مرکزی حکومت نے آج کی ریلی کو نقصان پہنچانے کی بھر پور کوشش کی مگر انہیں کامیابی نہیں ملی اور ریاست بھر سے لاکھوں افراد یہاں آکر ریلی کو کامیاب بنا رہے ہیں۔

ممتا بنرجی نے کہا کہ میں الیکشن کمیشن سے کہتی ہوں کہ پنچایت انتخابات بیلٹ پیپر کے ذریعہ منعقد کرائیں۔ ممتا بنرجی نے کہا کہ ای وی ایم مشین کے ذریعہ ووٹنگ عوام کے جذبات کی توہین اور مینڈیٹ چرانے کے مترادف ہے۔ اس لیے ای وی ایم مشین کی جگہ بیلٹ پیپر کی واپسی ہونی چاہیے۔

خیال رہے کہ 1993میں یوتھ کانگریس کا جلوس جس کی ممتا بنرجی قیادت کر رہی تھیں اور اس پر پولس فائرنگ میں 13 افراد کی موت ہوگئی تھی۔ اس کے بعد سے ہی ممتا بنرجی ان شہیدوں کی یاد میں ہر سال شہید دیوس کا اہتمام کرتی ہیں۔