یو پی میں برقع نشینوں پر نظر رکھی جائے: بی جے پی

لکھنؤ: بی جے پی اتر پردیش کے بلدیاتی انتخابات میں ووٹوں کی تقسیم (پولیرائیزیشن ) کولے کراپنی کوششوں میں پوری طرح مصروف ہے۔ پہلے مرحلے کے انتخابات میں تمام طرح کی شکایات اور لوگوں کے کھلے عام یہ بولنے کے بعد کہ وہ کسی کو بھی ووٹ ڈالیں ،ای وی ایم میں ووٹ بی جے پی کو ہی جا رہا ہے، اب خود بی جے پی کو بھی یہ محسوس ہونے لگا ہے کہ اس کی حالت خستہ ہے۔ ووٹوں کی تقسیم کو تیز کرنے اور مسلم ووٹ دہندگان کی حوصلہ شکنی کے لئے اب یو پی بی جے پی نے الیکشن کمیشن کو ایک خط لکھ کر پردہ نشینوں کو مشکوک قرار دے دیا ہے اور ان پر خصوصی نظر رکھنے کا مطالبہ کیا ہے۔

اتر پردیش بی جے پی کے نائب صدر اور ریاستی الیکشن انچارج جے پی ایس راٹھور نے ایک وفد کے ساتھ الیکشن کمیشن سے مل کر ایک خط سونپا ہے جس میں کہا گیا ہے کہ پردہ نشیں خواتین مشکوک ہوتی ہیں اس لئے ان کی شناخت کا الگ سے انتظام کیا جائے۔

دراصل یہ پہلا موقع نہیں ہے کہ جب مسلم خواتین کو الیکشن کے عمل میں شامل ہونے سے روکنے کی کوششیں کی جارہی ہوں۔ ابھی تین دن پہلے ہی اتر پردیش کے وزیر اعلیٰ یوگی آدتیہ ناتھ کی ریلی میں ایک مسلم خاتون کی سرعام بے عزتی کی گئی تھی اور اس کا برقع زبردستی اترواکر ضبط کر لیا گیا تھا۔

بلدیاتی انتخابات کی تشہیر کاری کے لئے منگل کے روز بلیا میں وزیر اعلیٰ کی ریلی تھی ۔ اس ریلی میں حصہ لینے کے وہ خاتون بھی آئی ہوئی تھی۔ سائرہ نامی خاتون جیسے ہی ریلی کے میدان میں پہنچی، وہاں موجود پولس اہلکاروں نے اس سے برقع اتارنے کے لئے کہا۔ خاتون نے نقاب اتار کر دپٹے سے اپنا چہرہ ڈھک لیا لیکن پولس نے اس سے پورا برقع اترواکر اسے ضبط کر لیا۔ اس واقع کو لے کر مسلمانوں میں سخت غم و غصہ دیکھا جا رہا ہے۔