’بی جے پی حجاب کی مخالفت کے بہانے فرقہ وارانہ پولرائزیشن کے لئے کوشاں‘

پرتاپ گڑھ: پیس پارٹی کے قومی صدر ڈاکٹر ایوب سرجن نے میڈیا کو جاری بیان میں کہا ہے کہ بی جے پی عوام میں اپنی کھسکتی زمین کے لئے اپنے زیر اقتدار صوبوں میں فسطائیت کا زہر گھول کر پانچ صوبوں میں ہو رہے انتخابات میں فرقہ وارانہ پولرائزیشن کے لئے حجاب کا ایشو بنایا ہے، تاکہ انتخاب میں اس کا فائدہ اٹھا سکے۔

ڈاکٹر ایوب سرجن نے کہا کہ بی جے پی کی عوام مخالف پالیسیوں کے سبب آج عام شخص پریشان و حکومت سے مشتعل ہے۔ ملک و صوبہ میں بڑھتی مہنگائی و بے روزگاری نے عام لوگوں کی کمر توڑ دی ہے، جس کے سبب غریب بے سہارا لوگ بھکمری کے دہلیز پر ہیں۔ بی جے پی حکومت کی کسان مخالف پالیسیوں کے سبب آج کسان خودکشی کے لئے مجبور ہے۔ کسانوں کو ان کی پیداوار کی مناسب قیمت نہ ملنے کے سبب وہ قرض میں ڈوبا ہوا ہے۔

انہوں نے کہا کہ بے روزگاری و مہنگائی نے لوگوں کو سوچنے اور بی جے پی کو اقتدار سے ہٹانے پر مجبور کر دیا۔ اتر پردیش و دیگر صوبوں میں ہو رہے انتخابات میں بی جے پی اپنی شکست دیکھ کر، اب وہ فسطائیت کا زہر گھول کر انتخاب میں کامیابی کا خواب دیکھ رہی ہے، جس کے لئے انتخاب کے دوران ایک سازش کے تحت تعلیمی اداروں میں مسلم طالبات کو حجاب میں آنے سے روکنے کے لئے ان پر بی جے پی و آر ایس ایس کے غنڈے حملہ کر فرقہ وارانہ پولرائزیشن کرنے میں کوشاں ہیں۔ مگر عوام بی جے پی حکومت سے اوب چکے ہیں اور وہ کسی سازش کا شکار ہو کر گمراہ ہونے والے نہیں ہیں۔

نہوں نے کہا کہ عوام بی جے پی کو اقتدار سے ہٹانے کے لئے تیار ہے ،اب فسطائیت کا کھیل کامیاب ہونے والا نہیں ہے، لوگوں کو مہنگائی و بے روزگاری سے نجات چاہیئے، جو سنیکت مورچہ کی حکومت دے سکتی ہے۔ سنیکت مورچہ میں شامل پارٹیوں کا خصوصی طور سے اترپردیش کے انتخاب میں اہم کردار ہوگا ۔سنیکت مورچہ کے بغیر کسی پارٹی کا اقتدار میں آنا ممکن نہیں ہے۔