اناؤ عصمت دری کے ملزم سینگر سے بی جے پی کی محبت برقرار!

اناؤ عصمت دری معاملہ نے بی جے پی اور یوگی حکومت کی ناک میں دم کر رکھا ہے۔ زبردست دباؤ کے پیش نظر پارٹی نے واقعہ کے ملزم اور رکن اسمبلی کلدیپ سنگھ سینگر کو نکال باہر کیا۔ لیکن سچ تو یہ ہے کہ بی جے پی نے بہت مجبوری میں یہ قدم اٹھایا اور ایسا اس لیے کہا جا سکتا ہے کہ پارٹی کے کئی لیڈران اب بھی سینگر کی حمایت میں باتیں کر رہے ہیں۔ عصمت دری کی شکار لڑکی کی تکلیف اور درد کی فکر کسی کو نہیں ہے۔

نابالغ لڑکی سے عصمت دری کرنے کے الزام میں گزشتہ ایک سال سے جیل میں بند بی جے پی سے نکالے گئے رکن اسمبلی سینگر کی حمایت میں پارٹی کے ہی رکن اسمبلی آشیش سنگھ نے بولنا شروع کر دیا ہے۔ ہردوئی سے بی جے پی رکن اسمبلی آشیش کا ایک ویڈیو منظر عام پر آیا ہے جس میں وہ سینگر کی حمایت میں بولتے ہوئے نظر آ رہے ہیں۔ ویڈیو میں وہ کہتے ہوئے دکھائی دے رہے ہیں کہ سینگر اس وقت مشکل وقت سے گزر رہے ہیں اور ان کی خواہش ہے کہ ان کے ساتھی (سینگر) جلد سے جلد جیل سے باہر آ جائیں۔

آشیش سنگھ کا یہ ویڈیو وائرل ہو چکا ہے جو کہ دو تین دن پہلے کا بتایا جا رہا ہے۔ میڈیا ذرائع کے مطابق اناؤ کے نزدیک ایک پنچایت پروگرام میں بی جے پی رکن اسمبلی آشیش سنگھ نے یہ باتیں کہیں۔ اناؤ سینگر کا آبائی شہر بھی ہے جہاں ان پر جون 2017 میں ایک نابالغ سے عصمت دری کا الزام عائد ہوا۔

بہر حال، ویڈیو میں آشیش سنگھ کہتے ہوئے نظر آ رہے ہیں کہ ’’ایسی مشکلوں کے دور سے گزر رہے ہیں ہم سب کے بیچ کے اپنے بھائی۔ محترم کلدیپ سنگھ سینگر جی ہم سب کے بیچ نہیں ہیں۔ کسی وجہ سے ایسا ہے اور اسے برا وقت کہا جائے گا۔ لیکن پھر بھی ہم سب کی نیک خواہشات ان کے (کلدیپ سینگر) ساتھ ہیں۔ جتنی بھی مشکلیں ہیں، جتنا بھی برا وقت ہے... ان سب سے لڑکر یقینی طور پر آپ سب کی قیادت کرنے آپ سب کے بیچ پہنچیں گے۔‘‘

واضح رہے کہ حال ہی میں اناؤ عصمت دری متاثرہ لڑکی اور اس کے وکیل ایک کار حادثہ میں سنگین طور پر زخمی ہو گئے۔ اس حادثہ میں متاثرہ کے دو رکے شتہ داروں کی موت ہو گئی۔ جس ٹرک سے کار کی ٹکر ہوئی اس کی نمبر پلیٹ پینٹ کی ہوئی تھی۔ تازہ خبروں کے مطابق حادثہ میں زخمی عصمت دری متاثرہ کی حالت اب بھی خطرے سے باہر نہیں ہے۔ متاثرہ لڑکی کے گھر والوں کا الزام ہے کہ یہ حادثہ نہیں تھا بلکہ جیل میں بند رکن اسمبلی کی سازش کا نتیجہ تھی۔