ہندو ہو تو ہمیں ووٹ دو: بی جے پی امیدوار

راجستھان کے الوار لوک سبھا ضمنی انتخاب میں بی جے پی کے امیدوار ڈاکٹر جسونت یادو کا ایک متنازعہ ویڈیو سوشل میڈیا پر وائرل ہو رہا ہے ۔ ویڈیو میں جسونت یادو یہ کہتے ہوئے نظر آ رہے ہیں کہ جو ہندو ہیں وہ مجھے ووٹ دیں اور جو مسلمان ہیں وہ کانگریس کے امیدوار کرن سنگھ کو ووٹ دیں۔‘‘

ڈاکٹر جسونت سنگھ وسندھرا حکومت میں محنت اور روزگار کے وزیر ہیں۔ انہیں بی جے پی نے الور لوک سبھا ضمنی انتخاب کے لئے امیدوار بنایا ہے۔ خبروں کے مطابق ضمنی انتخاب کے سلسلہ میں جسونت یادو ڈھونڈاریا گاؤں پہنچے تھے، وہیں انہوں نے یہ متنازعہ بیان دیا۔ ویڈیو میں جسونت یادو کہہ رہے ہیں ’’ میں میوات کے گاؤں میں گیا تھا۔ میں نے کہا اگر آپ ہندو ہو تو مجھے ووٹ دینا مسلمان ہو تو ڈاکٹر کرن سنگھ کو ووٹ دینا۔‘‘

ویڈیو میں ڈاکٹر جسونت یادو کے سامنے ہی ان کے حامی چناوی ضابطہ اخلاق کی خلاف ورزی کرتے نظر آ رہے ہیں۔ مائک سے ان کے حامی نے کہا کہ کاغذات نامزدگی داخل کرنے کے دوران آپ جتنی بھی گاڑیاں لے کر آئیں گے سب کا کرایہ وہ ادا کریں گے، کسی کو گھبرانے کی ضرورت نہیں ہے۔

الور لوک سبھا ضمنی انتخاب میں بی جے پی کا امیدوار بنائے جانے کے بعد ڈاکٹر جسونت یادو نے بہروڑ کے نزدیک 12 گاؤں کا دورہ کیا۔ دریں اثنا دودھیڑا گاؤں میں جسونت یادو کی تقریب کو کور کرنے سے میڈیا کوروکا گیا اور تقریب کے دوران کیمرے بند کروا دیئے گئے۔ الزام ہے کہ یہ سب جسونت سنگھ کے اشارے پر کیا گیا۔