انڈیا اتحاد کی حکومت بننے کے بعد بی جے پی لیڈر اور مرکزی ایجنسیوں کے افسر جیل جائیں گے: آتشی
آتشی نے کہا کہ ’انڈیا‘ کی حکومت بنے کے بعد ’الیکٹورل بانڈ‘ کی تحقیقات کرائی جائے گی، جس میں نہ صرف بی جے پی کے لیڈر بلکہ ای ڈی، سی بی آئی اور انکم ٹیکس ڈپارٹمنٹ کے افسر بھی جیل جائیں گے
![<div class="paragraphs"><p>دہلی کی وزیر آتشی / قومی آواز / وپن</p></div>](https://media.assettype.com/qaumiawaz%2F2024-04%2F066b8e93-ded2-4ddd-ae34-d62170885bda%2Fatishi_press_conference.jpg?rect=0%2C25%2C4000%2C2250&auto=format%2Ccompress&fmt=webp)
دہلی کی وزیر آتشی / قومی آواز / وپن
نئی دہلی: عام آدمی پارٹی کی لیڈر آتشی نے کہا کہ 4 جون کے بعد جب انڈیا اتحاد کی حکومت بنے گی تو الیکٹورل بانڈ اسکیم کی تحقیقات ہو گی جس میں نہ صرف بی جے پی کے لیڈر جیل جائیں گے بلکہ انفورسمنٹ ڈائریکٹوریٹ (ای ڈی)، سینٹرل بیورو آف انویسٹی گیشن (سی بی آئی) اور انکم ٹیکس ڈپارٹمنٹ کے افسر بھی جیل جائیں گے۔
دہلی کی کابینی وزیر آتشی نے منگل کو کہا کہ آج دہلی ہائی کورٹ نے منیش سسودیا کی ضمانت کی درخواست مسترد کر دی ہے۔ ہم ہائی کورٹ کا احترام کرتے ہیں، لیکن احترام کے ساتھ ہائی کورٹ کے فیصلے سے اختلاف کرتے ہیں کیونکہ یہ نام نہاد شراب گھوٹالہ بی جے پی کی طرف سے عام آدمی پارٹی پر حملہ کرنے اور اسے کچلنے کی ایک سیاسی سازش ہے۔ جب بی جے پی دہلی اور پنجاب میں انتخابی میدان میں عام آدمی پارٹی کو ہرانے میں ناکام ہوگئی تو ای ڈی- سی بی آئی کے ذریعے یہ سازش کی گئی۔ یہ سراسر سیاسی سازش ہے۔
انہوں نے کہا کہ نہ صرف ہندوستان بلکہ پوری دنیا کی تاریخ میں ایسا کوئی گھپلہ نہیں ہوا ہوگا جس میں ایک روپیہ بھی برآمد نہ ہوا ہو۔ اس کے بعد بھی عام آدمی پارٹی کے لیڈروں کو جھوٹے الزامات میں جیل بھیجا جا رہا ہے۔ یہ ایک سیاسی سازش ہے جس سے ظاہر ہوتا ہے کہ یہ سارا کیس ملزمان سے دباؤ میں لئے گئے بیانات کی بنیاد پر بناہوا ہے۔ ہم نے دیکھا کہ ملزمان پر کس طرح دباؤ ڈالا جاتا ہے۔ جب تک ملزم عام آدمی پارٹی کے لیڈروں کے خلاف بیان نہیں دیتے، انہیں مارا پیٹا جاتا ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔