بی جے پی تین مقاصد پر کام کر رہی ہے، پارٹی کے لیے چندہ، تاجروں کے لیے ڈنڈا اور ای ڈی کا پھندا! جے رام رمیش

نئی دہلی: لوک سبھا انتخابات کے لیے انڈیا الائنس کی تیسری ریلی اتوار کو دہلی کے رام لیلا میدان میں منعقد ہونے جا رہی ہے۔ اس دوران حزب اختلاف کی اتحادی جماعتوں کے بعض رہنماؤں کو جیل بھیج دیا گیا ہے۔ اہم اپوزیشن پارٹی کانگریس کو ہر روز محکمہ انکم ٹیکس نوٹس بھیج رہا ہے۔ پارٹی کے بینک اکاؤنٹ کو مبینہ طور پر منجمد کر دیا گیا ہے۔ اس پر پارٹی کے ترجمان جے رام رمیش نے کہا کہ بی جے پی 3 منصوبوں پر کام کر رہی ہے اور وہ ہیں ’پارٹی کے لیے چندہ، تاجروں کو ڈنڈا اور ای ڈی کا پھندا!‘‘

کانگریس کے ترجمان جے رام رمیش نے ایک پریس کانفرنس میں کہا، ’’کل کی ریلی کسی فرد مرکوز ریلی نہیں ہے، یہ انڈیا اتحاد کی ریلی ہے، یہ کسی ایک پارٹی کی ریلی نہیں ہے۔ پہلی ریلی ممبئی کے شیواجی پارک میں منعقد ہوئی تھی اور دوسری ریلی دہلی میں منعقد ہونے جا رہی ہے۔‘‘

مغربی بنگال میں ٹی ایم سی اور کانگریس کے درمیان کوئی سیٹ شیئرنگ نہیں ہے لیکن جے رام رمیش نے کہا کہ کل کی ریلی میں بہت سے لوگ شرکت کریں گے۔ ٹی ایم سی بھی ریلی میں آئے گی۔ جے رام رمیش نے کہا کہ ریلی کا موضوع ’جمہوریت بچاؤ‘ رکھا گیا ہے۔

جے رام رمیش نے کہا کہ مرکزی ایجنسیوں کا غلط استعمال ہو رہا ہے۔ انہوں نے کہا کہ اپوزیشن جماعتوں کے خلاف ’ٹیکس ٹیررزم‘ کی جا رہی ہے۔ خاص طور پر کانگریس پارٹی کو نشانہ بنایا گیا ہے۔ انہوں نے بتایا کہ کل کی پریس کانفرنس تک کانگریس کو آئی ٹی سے چار نوٹس موصول ہوئے تھے لیکن کل رات دو مزید نوٹس بھیجے گئے۔ انہوں نے کہا کہ کیسری جی کے وقت تک کے نوٹس موصول ہوئے ہیں۔

جے رام رمیش نے بتایا کہ رام لیلا میدان میں منعقد ہونے والی ریلی میں اپوزیشن لیڈروں کے اہم مسائل کیا ہوں گے۔ اپوزیشن لیڈر مہنگائی، بے روزگاری اور پولرائزیشن پر اپنے خیالات پیش کریں گے۔ اپوزیشن جماعتوں کو مسلسل نشانہ بنایا جا رہا ہے، جس پر اپوزیشن رہنما بحث کریں گے۔ مختلف ریاستوں میں دو وزرائے اعلیٰ اور کئی وزراء کو گرفتار کیا گیا ہے۔ الیکٹورل بانڈ پر بھی بحث ہوگی جسے سپریم کورٹ نے غیر آئینی قرار دیا ہے۔