بی جے پی ملک میں بے روزگاری بڑھنے کی ذمہ دار: راہل گاندھی

جے پور: کانگریس کے قومی صدر راہل گاندھی نے مودی حکومت پر ملک میں بے روزگاری بڑھانے کا الزام لگاتے ہوئے کہا ہے کہ کانگریس اقتدار میں آئی تو ایک سال میں 24 لاکھ نوجوانوں کو سرکاری نوکریاں دی جائیں گی۔

راہل گاندھی نے جے پور ضلع کے چومو میں انتخابی ریلی سے خطاب کرتے ہوئے کہا کہ ملک میں مودی حکومت آنے کے بعد بے روزگاری میں جس قدر اضافہ ہوا ہے اتنا آزادی کے بعد اب تک نہیں تھا۔ وزیر اعظم نریندر مودی نے گزشتہ لوک سبھا انتخابات میں ایک سال میں دو کروڑ نوجوانوں کو روزگار دینے اور ہر خاندان کے اکاؤنٹ میں پندرہ لاکھ روپے جمع کرانے کا وعدہ کیا تھا، جو جھوٹا ثابت ہوا ہے۔

انہوں نے کہا کہ کانگریس نے اپنے منشور میں ایک سال میں 24 لاکھ نوجوانوں کو سرکاری نوکریاں دینے کا وعدہ کیا ہے۔ اس کے علاوہ گرام پنچایتوں میں دس لاکھ نوجوانوں کو روزگار دینے کا بھی ذکر کیا ہے۔

راہل گاندھی نے کہا کہ کانگریس کی ’نیائے یوجنا ‘سے ملک کے 20 فیصد غریب پانچ کروڑ خاندانوں کے اکاؤنٹ میں ایک سال میں 72 ہزار اور پانچ سال میں تین لاکھ ساٹھ ہزار روپے جمع کرائے جائیں گے۔ نیائے یوجنا سے نہ صرف غریب خاندانوں کو فائدہ ہو گا بلکہ اس سے چھوٹے دکانداروں، مڈل کلاس کو فائدہ ہو گا اور معیشت میں بھی مضبوطی آئے گی۔

انہوں نے کہا کہ نیائے یوجنا کی رقم غریب خاندان کے اکاؤنٹ میں اس وقت تک جمع ہوتی رہے گی جب تک اس خاندان کی ماہانہ آمدنی 12 ہزار روپے سے زیادہ نہیں ہوتی۔

راہل گاندھی نے الزام لگایا کہ مودی نے ملک کے سب سے امیر 15 لوگوں کا پانچ لاکھ 55 ہزار کروڑ روپے کا قرض معاف کر دیا جبکہ کسانوں، چھوٹے دكاندارو اور نوجوانوں کا قرض معاف نہیں کیا۔ انہوں نے الزام لگایا کہ مودی نے فضائیہ سے 30 ہزار کروڑ روپے چوری کرکے انل امبانی کو دے دیئے۔

انل امبانی پر 45 ہزار کروڑ کا بینک قرض تھا جسے ادا نہ کرنے کی وجہ سے ا سے جیل کی سزا ہونی تھی لیکن اس کے بھائی کی مدد سے وہ جیل جانے سے بچ گیا۔ انل امبانی کو مودی نے رافیل طیارے بنانے کا ٹھیکہ دے دیا جس کے پاس اس کا کوئی تجربہ نہیں ہے۔ راہل گاندھی نے کہا کہ کانگریس کی حکومت بننے پر جی ایس ٹی کو آسان بناکر کم سے کم اور آسان ٹیکس رکھا جائے گا جس سے اس میں ہونے والی پریشانی سے راحت مل سکے۔

عوامی ریلی سے راجستھان کے وزیر اعلی اشوک گہلوت، ریاستی کانگریس کے صدر اور نائب وزیر اعلی سچن پائلٹ، آل انڈیا کانگریس کمیٹی کے جنرل سکریٹری اور راجستھان کے انچارج اویناش پانڈے نے بھی خطاب کیا۔