بی جے پی کو جھارکھنڈ میں لگنے والا ہے زوردار جھٹکا، 16 اراکین اسمبلی بغاوت کو تیار!

مہاراشٹر میں برسراقتدار شیوسینا میں جب بغاوت ہوئی تو بی جے پی نے اس کو ہوا دیتے ہوئے باغی شیوسینا اراکین اسمبلی کے ساتھ مل کر اُدھو ٹھاکرے حکومت کو بے دخل کرتے ہوئے نئی حکومت تشکیل دے دی، اور اب جھارکھنڈ میں بی جے پی کو اپنی پارٹی میں اتحاد قائم رکھنا مشکل ہو رہا ہے۔ جھارکھنڈ میں برسراقتدار جے ایم ایم (جھارکھنڈ مکتی مورچہ) کی طرف سے دعویٰ کیا جا رہا ہے کہ 16 بی جے پی اراکین اسمبلی پارٹی میں گھٹن محسوس کر رہے ہیں، اور جلد ہی وہ جے ایم ایم کی حمایت کا اعلان کریں گے۔

میڈیا رپورٹ کے مطابق جے ایم ایم جنرل سکریٹری سپریو بھٹاچاریہ نے یہ دعویٰ کیا ہے اور انھوں نے کہا ہے کہ بی جے پی کے 16 اراکین اسمبلی جے ایم ایم کے رابطے میں ہیں۔ یہ باغی اراکین اسمبلی ہیمنت سورین حکومت کی حمایت کا جلد ہی اعلان کر سکتے ہیں۔ سپریو بھٹاچاریہ کے اس بیان نے جھارکھنڈ کی سیاست میں زبردست ہلچل پیدا کر دی ہے۔

سپریو بھٹاچاریہ کا کہنا ہے کہ بی جے پی 16 باغی اراکین اسمبلی الگ پارٹی بنا کر جھارکھنڈ مکتی مورچہ حکومت کی حمایت کر سکتے ہیں۔ ساتھ ہی انھوں نے کہا کہ جے ایم ایم اس تجویز پر تبھی غور کرے گی جب رسمی طور پر تجویز ان کے پاس بھیجی جائے گی۔ جے ایم ایم جنرل سکریٹری نے یہ بیان اس سوال کے جواب میں دیا جس میں پوچھا گیا تھا کہ ہیمنت سورین کی حکومت کو کوئی خطرہ تو نہیں ہے؟ یہ بھی پوچھا گیا تھا کہ کانگریس اراکین اسمبلی کو بی جے پی کے ذریعہ لالچ دینے کی کوشش ہو رہی ہے۔

بہرحال، بی جے پی نے جے ایم ایم کے اس دعویٰ کو مسترد کر دیا ہے۔ پارٹی ترجمان پرتل شاہدیو نے کہا کہ جے ایم ایم رکن اسمبلی خود گھٹنوں تک بدعنوانی میں ملوث ہیں اور سورین کی پارٹی وجود بچانے کی لڑائی لڑ رہی ہے۔ پرتل شاہدیو نے الزام عائد کیا کہ جے ایم ایم اراکین اسمبلی نے پہلے بدعنوانی کر کے پیسہ لوٹا، اور اب جھوٹی باتیں کر کے ڈوبتی کشتی کو بچانے کی کوشش کر رہے ہیں۔