بی جے پی نے آئین و جمہوریت کے وقار کو پامال کیا ہے، 2027 میں عوام سبق سکھائیں گے: اکھلیش

اتر پردیش کے سابق وزیر اعلیٰ اور سماج وادی پارٹی کے قومی صدر اکھلیش یادو نے بی جے پی کو سخت تنقید کا نشانہ بنایا ہے۔ انہوں نے کہا ہے کہ بی جے پی اپنے سیاسی فائدہ کے لیے اقتدار کا غلط استعمال کر رہی ہے۔ وہ سازش کی تمام حدیں پار کر چکی ہے۔ اس پارٹی نے عوام، کسانوں، نوجوانوں، تاجروں، غریبوں کے ساتھ فریب کیا ہے۔ 2027 کے اسمبلی انتخابات میں یوپی کے عوام بی جے پی کو اقتدار سے باہر کا راستہ دکھا دیں گے۔ اب اس کی کوئی بھی سازش کامیاب نہیں ہوگی۔

اکھلیش یادو نے پیر کو ایس پی صدر دفتر میں کارکنان سے باتیں کرتے ہوئے کہا کہ وہ تنظیم کو اور مضبوط کرنے میں سرگرم ہو جائیں۔ تنظیم بوتھ سطح پر مضبوط ہونی چاہیے۔ بوتھ سطح پر ایجنٹ بنائیں۔ کسان، نوجوان سمیت سبھی طبقوں کے مسائل اٹھائیں۔ غریبوں اور مظلوموں کو انصاف دلانے میں مدد کریں۔

انہوں نے کہا کہ ریاست ہی نہیں ملک کے عوام بھی سماج وادیوں کی طرف بڑی امید سے دیکھ رہے ہیں۔ لوگ سماج وادی پارٹی حکومت میں کیے گئے ترقیاتی کاموں، عوامی مفاد کے فیصلوں کو یاد کر رہے ہیں۔

میٹنگ میں اکھلیش یادو نے بی جے پی پر اتر پردیش کو برباد کرنے کا الزام لگاتے ہوئے کہا کہ اب عوام کو 2027 کا انتظار ہے جب بی جے پی کو سبق سکھانے کا موقع ملے گا۔ انہوں نے کہا کہ بی جے پی کا رویہ عوام مخالف ہے۔ ناانصافی، ظلم اپنے عروج پر ہے۔ آئین اور جمہوریت کے وقار کو پامال کیا جا رہا ہے۔ لوگوں کے ساتھ امتیازی سلوک ہو رہا ہے۔

سماج وادی پارٹی سربراہ نے مزید کہا کہ بی جے پی حکومت میں عوامی مسائل بڑھتے جا رہے ہیں۔ ان مسائل کا کوئی حل نہیں نکالا جا رہا ہے۔ حکومت میں جھوٹ اور لوٹ کا بول بالا ہے۔ مہنگائی اور بے روزگاری، بدعنوانی اپنے عروج پر پہنچ چکی ہے۔ غریبوں کی کسی کو بھی فکر نہیں ہے اور وہ انصاف کے لیے بھٹک رہے ہیں۔

اس میٹنگ میں مہاراج گنج ضلع کے رہنما و کارکنان خاص طور پر شامل ہوئے۔ اکھلیش یادو نے ان کے ساتھ ضلع میں پارٹی کے انتخابی نتائج و موجودہ سرگرمیوں پر بات چیت کی۔