بی جے پی نے اپوزیشن لیڈروں کو انتخابی مہم سے روکنے کے لیے ای ڈی کو اپنا ہتھیار بنایا، گوپال رائے کا سنگین الزام

نئی دہلی: عام آدمی عام آدمی پارٹی کے قومی کنوینر اور دہلی کے وزیر اعلی اروند کیجریوال کو ای ڈی کی طرف سے چار سمن بھیجے جانے پر پارٹی نے بی جے پی پر سخت حملہ بولا ہے۔ پارٹی کا کہنا ہے کہ بی جے پی نے ای ڈی سے یہ چوتھا سمن اروند کیجریوال کو لوک سبھا انتخابات کی تیاری اور مہم چلانے سے روکنے کے لیے بھیجا ہے۔

دہلی حکومت کے وزیر گوپال رائے کا کہنا ہے کہ بی جے پی نہیں چاہتی کہ کوئی اپوزیشن لیڈر لوک سبھا انتخابات میں مہم چلائے۔ بی جے پی نے اپوزیشن لیڈروں کو انتخابی مہم سے روکنے کے لیے ای ڈی کو اپنا ہتھیار بنا لیا ہے۔ اروند کیجریوال 18 جنوری سے گوا کا تین روزہ دورہ کر رہے ہیں۔ وہیں ہفتہ کو ای ڈی نے کیجریوال کو 18 جنوری کو ہی سمن بھیجا تھا۔ یہ کوئی اتفاق نہیں ہے۔ ہماری درخواست ہے کہ ای ڈی کو بی جے پی کی فرنٹل تنظیم بننے سے گریز کرنا چاہیے۔ نیز، بی جے پی کو بھی ای ڈی کا سیاسی طور پر غلط استعمال کرنے سے گریز کرنا چاہئے۔‘‘

عآپ کے دہلی ریاستی کوآرڈینیٹر گوپال رائے نے ہفتہ کو پارٹی ہیڈکوارٹر میں کہا کہ ای ڈی نے ایک بار پھر وزیر اعلی اروند کیجریوال کو نوٹس بھیجا ہے۔ انہوں نے کہا، ’’لوک سبھا انتخابات کی تیاریوں کے پیش نظر وزیر اعلیٰ 18، 19 اور 20 جنوری کو 3 روزہ دورے پر گوا جائیں گے اور اب میڈیا کے ذریعے خبریں موصول ہوئی ہیں کہ ای ڈی نے 18 جنوری کو سمن جاری کیا ہے۔ یہ کوئی اتفاق نہیں ہے۔ ای ڈی اتنے دنوں تک خاموش رہی لیکن جب جمعہ کو میڈیا میں اروند کیجریوال کے گوا دورے کے پروگرام کا اعلان ہوا تو ای ڈی نے نوٹس بھی بھیج دیا۔‘‘

رائے نے کہا، ’’اس نوٹس سے صاف نظر آ رہا ہے کہ ای ڈی کو اروند کیجریوال کو لوک سبھا انتخابات کی مہم چلانے اور انتخابات کی تیاریوں سے روکنے کے لیے ایک ہتھیار بنایا گیا ہے۔ ایسا لگتا ہے کہ ای ڈی ایک فرنٹل آرگنائزیشن کی طرح کام کر رہی ہے۔ جبکہ ای ڈی ایک آئینی ادارہ ہے۔‘‘

انہوں نے کہا، ’’آئینی ادارے کا نوٹس وزیر اعلیٰ تک پہنچنے سے پہلے ہی میڈیا میں لیک ہو جاتا ہے۔ ای ڈی کا نوٹس وزیر اعلیٰ تک نہیں پہنچا اور ہمیں میڈیا سے نوٹس بھیجے جانے کی خبر ملی کہ ای ڈی کا چوتھا نوٹس جاری کیا گیا ہے۔ یہ لوگ بے سر پیر کے اروند کیجریوال کو روکنے کے لیے بار بار جو نوٹس بھیج رہے ہیں، اسے بند کرنا چاہئے۔‘‘