ہمارے دباؤ میں گھبراکر بی جے پی نے وزیر اعلی تبدیل کیا، ہاردک پٹیل

پانچ سال وزیر اعلی بنے رہنے کے بعد اور جب اسمبلی انتخابات میں صرف ایک سال کی مدت رہ گئی ہو اس وقت وجے روپانی کے استعفے نے سب کو حیران تو کیا ہے اور یہ بھی واضح کر دیا ہے کہ بی جے پی کو اس بات کا اندازہ ہو گیا تھا کہ وجے روپانی کی قیادت میں گجرات جیت نہیں سکتے۔ بی جے پی نے ان کی جگہ جس کو وزیر اعلی بنا یا ہے اس کے انتخاب پر بھی سب کو حیرانی ہوئی ہے ۔

بی جے پی نے وجے روپانی کی جگہ پٹیل سماج کے پہلی مرتبہ بنے رکن اسمبلی بھوپیندر پٹیل کو وزیر اعلی بنایا ہے ۔ مبصرین کی رائے یہ ہے کہ پٹیل سماج کو اپنی جانب راغب کرنے کی وجہ سے انہیں وزیر اعلی بنایا گیا ہے۔ واضح رہے گزشتہ اسمبلی انتخابات سے ایک سال پہلے پٹیل سماج کی ناراضگی کو دیکھتے ہوئے پٹیل سماج کی آنندی بین پٹیل کو وزیر اعلی کے عہدے سے ہٹایا دیا تھا ۔ یعنی پٹیل سماج کی ناراضگی کی وجہ سے پہلے پٹیل وزیر اعلی ہٹایا گیا اور اب بنایا گیا۔ یہ وجہ سمجھ نہیں آتی ۔

گجرات میں کانگریس کے کارگزار صدر نوجوان ہاردک پٹیل نے ایک نیوز پورٹل کو دئے اپنے انٹرویو میں کہا ہے کہ اس بات سے کوئی فرق نہیں پڑتا کہ وزیر اعلی کا تعلق کس طبقہ سے ہے کیونکہ وزیر اعلی پوری ریاست کا ہوتا ہے لیکن بی جے پی نے جو وزیر اعلی کو بدلنے کا قدم اٹھایا ہے وہ کانگریس کی جاری تحریک سے گھبراکر اٹھایا ہے ۔

ہاردک پٹیل نے مودی فیکٹر کو بھی پوری طرح خارج کرتے ہوئے کہا کہ گزشتہ اسمبلی انتخابات میں وزیر اعظم مودی نے ایڑی چوٹی کا زور لگایا تھا لیکن پھر بھی صر ف دس سیٹوں کا معمولی فرق ہی تھا تو دونو پارٹیو میں ۔ انہوں نے کہا کہ بڑھتی بے روزگاری اور کوورونا کی وبا کے دوران حکومت کی بد انتظامی کی وجہ سے گجرات کے لوگوں میں بی جے پی سے سخت ناراضگی ہے۔