دہلی کے تینوں میونسپل کارپوریشنوں کو متحد کرنے کا بل آج لوک سبھا میں ہوگا پیش

عام آدمی پارٹی دہلی کے تین میونسپل کارپوریشنوں کے انتخابات کو ملتوی کرنے کو لے کر بی جے پی پر مسلسل حملہ کر رہی ہے۔ الیکشن کمیشن نے دلیل دی تھی کہ مرکزی حکومت تینوں کارپوریشنوں کو متحد کرنا چاہتی ہے، اسی لیے انتخابات کی تاریخیں ملتوی کر دی گئی ہیں۔ اب اس حوالے سے آج پارلیمنٹ میں بل پیش ہونے جا رہا ہے۔

دہلی کی تین میونسپل کارپوریشنوں کو متحد کرنے کا بل جمعہ یعنی آج 25 مارچ کو لوک سبھا میں پیش کیا جائے گا۔ وزیر داخلہ امت شاہ یہ بل پیش کریں گے۔ قبل ازیں اس تجویز کو مرکزی کابینہ نے منظوری دی تھی۔ پارلیمنٹ سے بل پاس ہونے کے بعد دہلی کی تینوں میونسپل کارپوریشنوں کو تحلیل کر کے انتخابات کرائے جائیں گے۔

دہلی میونسپل کارپوریشن انتخابات کی تاریخوں کا اعلان ہونے والا تھا، لیکن آخری موقع پر الیکشن کمیشن نے کہا کہ یہ انتخابات فی الحال ملتوی کر دیے گئے ہیں کیونکہ مرکزی حکومت اس حوالے سے ایک بل پیش کرنے جا رہی ہے۔

دہلی کی حکمراں عام آدمی پارٹی نے اس کی سخت مخالفت کی ہے۔ کیجریوال کی پارٹی نے الیکشن کمیشن اور بی جے پی حکومت پر سنگین الزامات لگائے ہیں۔ دہلی کے وزیر اعلی اروند کیجریوال نے کہا کہ بی جے پی انتخابات نہیں چاہتی۔ بی جے پی لیڈروں نے ایم سی ڈی میں لوٹنے کے تمام ریکارڈ توڑ دیے ہیں۔

عام آدمی پارٹی کے قومی کنوینر کیجریوال نے کہا کہ آخر بی جے پی نے پچھلے سات سالوں میں تینوں کارپوریشنوں کو ضم کرنے کا فیصلہ کیوں نہیں کیا۔ "آپ (بی جے پی) پچھلے سات سالوں سے کہاں سوئے تھے۔ اسمبلی میں تقریر کرتے ہوئے کیجریوال نے الزام لگایا کہ بی جے پی بابا صاحب امبیڈکر سے نفرت کرتی ہے کیونکہ انہوں نے آئین اور جمہوریت دی۔ انہوں نے بی جے پی کو چیلنج کیا کہ وہ وقت پر ایم سی ڈی انتخابات کرائے اور جیت جائے۔ کیجریوال نے طنز کرتے ہوئے کہا، "دنیا کی سب سے بڑی پارٹی (بی جے پی) دنیا کی سب سے چھوٹی پارٹی (اے اے پی) سے خوفزدہ ہے۔"