بہار اسمبلی میں اسپیکر سے ہی شروع ہو گئی ریاستی وزیر کی نوک جھونک، دیکھیں ویڈیو

پٹنہ: بہار اسمبلی میں آج اس وقت غیر معمولی صورتحال پیدا ہوگئی جب پنچایتی راج کے وزیر سمراٹ چودھری کے سخت الفاظ سے ناراض اسمبلی اسپیکر نے وقفہ سوالات کے درمیان ہی ایوان کی کارروائی ملتوی کر دی۔ اسمبلی میں بدھ کو وقفہ سولات کے دوران بھارتیہ جنتا پارٹی ( بی جے پی ) کے ونے بہاری کے سوال کے جواب کے دوران اسمبلی اسپیکر وجے کمار سنہا نے آن لائن جواب نہیں دینے پر وزیر سمراٹ چودھری کو اسے سنجیدگی سے لینے کی ہدایت دی۔ اس پر وزیر نے تلخ لہجے میں کہا کہ ”آپ جانکاری لے لیں محکمہ کی جانب سے 16 میں سے چودہ سولات کے جواب دیئے گئے ہیں۔“

اس پر اسمبلی اسپیکر نے کہا کہ” آج صبح نوبجے تک 16 میں سے 11 سوالات کے جواب ہی آن لائن آئے تھے، جو 69 فیصد ہیں۔ آپ اپنے محکمہ کے افسران کو ہدایت دیں کہ وہ آن لائن جواب وقت پر دیا کریں۔“ وزیر نے اس کے بعد کہا کہ اسے دیکھ لیں گے لیکن اس میں زیادہ ’ ویاکل ‘ (پریشان) ہونے کی ضرورت نہیں ہے۔ اس پر اسپیکر نے وزیر سے ” ویاکل“ لفظ واپس لینے کو کہا لیکن وزیر اس کے لئے تیار نہیں ہوئے اور کہا کہ اس طرح سے آپ ایوان نہیں چلائیں۔ وزیر کے ان الفاظ سے ناراض اسمبلی اسپیکر نے گیارہ بج کر 29 منٹ پر ایوان کی کارروائی 12 بجے دن تک کے لئے ملتوی کر دی۔

غور طلب ہے کہ کچھ دنوں سے حزب اقتدار کے اراکین اور وزیروں کو کئی بار پھٹکار لگانے کی وجہ سے اسپیکر کے تئیں ناراضگی بڑھ رہی تھی۔ اسمبلی میں راشٹریہ جنتادل ( آرجے ڈی ) اور اپوزیشن کے لیڈر تیجسوی پرساد یادو کے وزیر پر کیے گئے تبصرہ سے حزب اقتدار کے ہنگامہ کے دوران نائب وزیراعلیٰ تارکشور پرساد نے سموار کو کہا تھا کہ ایوان میں غلط روایت قائم کرنے کی کوشش کی جا رہی ہے۔

تارکشور پرساد نے کہا کہ اپوزیشن کے لیڈر مسلسل تین دنوں سے حزب اقتدار کے لیڈران اور وزیروں کے خلاف بیچ۔ بیچ میں غیر ضروری تبصرے کرتے رہے ہیں، لیکن اسپیکر کی جانب سے انہیں ایسا کرنے سے روکنے کی سخت کوشش نہیں کی گئی۔ انہوں نے کہا کہ ایوان میں وہ بے عزت ہونے کے لئے نہیں بیٹھے ہیں۔

وہیں بی جے پی کے سنیئر لیڈر نند کشور یادو نے کہا کہ ایوان کے سبھی اراکین کی عزت اور وقار ہے۔ اپوزیشن لیڈر کا وزیر کے خلاف تبصرہ غیر مناسب اور توہین آمیز ہے اور اس کے لئے انہیں معافی طلب کرنی چاہیے تاکہ ایوان کی کارروائی بہتر طریقے سے چل سکے۔ انہوں نے کہا کہ ایوان کے اراکین کی توہین برداشت نہیں کی جائے گی۔

ایوان میں اراکین کی مسلسل بڑھتی ناراضگی پر منگل کو اسپیکر وجے کمار سنہا نے کہا کہ اراکین کا اعتبار ان کے سلوک اور طرز عمل پر منحصر ہے اور اس لئے سلوک اور طرز عمل کو کنٹرول میں رکھنے کی ضرورت ہے۔ کوئی بھی اسپیکر پر دباﺅ نہیں بنا سکتا ہے۔ انہوں نے طرز عمل کی وضاحت کرتے ہوئے کہا کہ ”زندگی فانی ہے، جو آیا ہے اسے ایک دن جانا ہے لیکن آپ کا سلوک اور طرز عمل ہی یاد کیا جائے گا۔“

اسپیکر نے کہا کہ کچھ دنوں سے حزب اقتدار اور اختلاف کے اراکین اسپیکر پر بھید۔ بھاﺅ کرنے کا الزام لگا رہے ہیں۔ اسپیکر پوری طرح سے غیرجانبدار ہوکر کام کر رہے ہیں۔ عوام سبھی کے رویے کو دیکھ رہے ہیں“۔ انہوں نے کہا کہ کسی پر الزام لگانے سے قبل اراکین اس کی طلاع ایوان کو دیں۔