بہار: ’اولاد‘ کی آس میں معصوم ’بھتیجے‘ کی بلی! تانترک سمیت دو ملزمان گرفتار

بھاگل پور: دنیا نے چاہے کتنی بھی ترقی کر لی ہو لیکن معاشرے میں توہم پرستی اور اندھا عقیدہ آج بھی موجود ہے۔ اس کی تازہ مثال بہار کے ضلع بھاگل پور میں اس وقت نظر آئی جب ایک شخص نے اپنی بیوی کی گود بھرنے کے لئے اپنے بھیجے کو قتل کر دیا۔ اطلاعات کے مطابق یہ واقعہ پیر پینتی تھانہ علاقہ میں پیش آیا۔ شیونندن نامی شخص پر الزام ہے کہ اس نے تانترک کے کہنے پر اپنے 11 سالہ معصوم بھتیجے کو بلی چڑھا دیا۔

دیوالی کے موقع پر اماوس کی رات میں ونوبا ٹولی گاؤں کے رہائشی شیونندن رویداس نے گاؤں کے ہی تانترک ولاس منڈل کے ساتھ ’کالی دیوی‘ کی پوجا کی اور آدھی رات کے بعد اپنے بھتیجے کو گاؤں کے قریب بانس کے جنگل میں لے جاکر اسے بلی چڑھا دیا۔ شیونندن نے بھتیجے کو قتل کرنے کے بعد بیخوف انداز میں کہا، ’’ہاں، ہم نے اپنے بھتیجے کی بلی دی ہے۔‘‘

پولس کے مطابق شریمت پور حضور نگر پنچایت کے بنووا ٹولی گاؤں کے شیوننندن رویداس کی شادی 13 سال قبل ہوئی تھی۔ جب اس کی کوئی اولاد نہ ہوئی تو اس نے اپنی بیوی کو وہاں سے بھگا دیا۔ اس کے بعد، 10 سال پہلے اس نے دوسری شادی کر لی لیکن اس کے بعد بھی اس کی اولاد نہیں ہوئی، جس کی وجہ سے وہ بہت پریشان تھا۔

ذرائع کے مطابق، شیو نندن اس کے بعد تانترک ولاس منڈل کے ساتھ رابطے میں آیا۔ تانترک نے اسے بچہ ہونے کی یقین دہانی کرائی اور کہا کہ اسے کالی پوجا کرنی ہوگی اور اپنے کنبہ کے کسی فرد کو بلی چڑھانا ہوگا۔ اس کے بعد، شیونندن اپنے بھائی سکندر کے بیٹے کنہائی کو پٹاخے خریدنے کے بہانے لیا اور اسے قتل کر دیا۔

بھاگل پور کے سینئر سپرنٹنڈنٹ آف پولس (ایس ایس پی) آشیش بھارتی نے بتایا، ’’شیونندن نے اپنے بھتیجے کا پہلے گلا کاٹا، پھر اس نے دائیں ہاتھ کی شہ رگ کاٹ کر اس کے پیٹ میں زخم کر کے قتل کر دیا اور لاش کو وہیں پھینک دیا۔‘‘ انہوں نے کہا ، ’’دونوں ملزمان کو گرفتار کرلیا گیا ہے اور پولس سے پوچھ گچھ کے دوران دونوں نے اپنے جرم کا اعتراف کر لیا ہے۔ ہلاک ہونے والے بچے کی ماں وینا دیوی کے بیان کی بنیاد پر پیر پینتی پولس اسٹیشن میں آئی پی سی کی دفعہ 302، 201 اور 34 کے علاوہ ’ڈائن ایکٹ‘ اور ایس سی، ایس ٹی ایکٹ کے تحت ایف آئی آر درج کی گئی ہے۔

بھاگل پور کے ایس ایس پی بھارتی کا کہنا ہے کہ معاملہ میں تیزی سے کارروائی کر کے مجرموں کو جلد سزا دینے کی کوشش کی جائے گی۔ انہوں نے کہا کہ یہ معاملہ پوری طرح سے توہم پرستی سے وابستہ ہے۔ انہوں نے کہا کہ پولس ضلع میں توہم پرستی کے خلاف بے داری مہم چلائے گی، تاکہ اس طرح کے واقعات کو روکا جا سکے۔