بہار: حاجی پور میں بدعنوانی کی بھینٹ چڑھ گیا پُل، افتتاح سے پہلے ہی ٹوٹ گئی سڑک، کمیشن خوری کا لگا الزام

بہار میں پُل منہدم ہونے کے واقعات لگاتار پیش آ رہے ہیں، لیکن اب ایک ایسا معاملہ سامنے آ رہا ہے جہاں پُل کا افتتاح بھی نہیں ہوا اور اس کی سڑک دھنس گئی ہے۔ میڈیا رپورٹس کے مطابق ویشالی ضلع کے حاجی پور میں راماشیش چوک پر پُل پر بنی سڑک ٹوٹ گئی ہے اور اس کی تصویریں اب سوشل میڈیا پر وائرل ہو رہی ہیں۔ حاجی پور-چھپرہ شاہراہ پر سڑک دھنس جانے کے بعد راستے سے گزر رہے آر جے ڈی رکن اسمبلی مکیش روشن نے جب یہ دیکھا تو وہ اسے دیکھنے پہنچ گئے اور پولیس سپرنٹنڈنٹ کو فون کر کے واقعہ کی جانکاری دی۔

بتایا جا رہا ہے کہ پہلے پُل پر آمد و رفت بند کروائی گئی اور پھر بتایا گیا کہ پُل چھ ماہ پہلے ہی بن کر تیار ہوا ہے۔ پُل بنتے ہی آمد و رفت شروع کر دی گئی۔ پُل سے چھوٹی اور بڑی گاڑیاں آنے جانے لگیں۔ حاجی پور-چھپرہ سڑک ابھی زیر تعمیر ہے اور اس سڑک کا ابھی تک افتتاح بھی نہیں کرایا گیا ہے۔ اگر صحیح وقت پر پُل پر آمد و رفت بند نہیں ہوتی تو کوئی بھی بڑا حادثہ ہو سکتا تھا۔ اس حادثے نے ایک بار پھر ثابت کر دیا کہ بہار میں بدعنوانی کا اب بھی بول بالا ہے۔

آر جے ڈی رکن اسمبلی مکیش روشن نے اس معاملے میں بہار کی نتیش حکومت کو سخت تنقید کا نشانہ بنایا ہے۔ انھوں نے حملہ آور انداز میں کہا کہ بہار میں کہیں نہ کہیں بدعنوانی کا بول بالا ہے اور اسی کا نتیجہ سامنے آ رہا ہے۔ جب 40 فیصد کمیشن افسران اور لیڈران لیتے رہیں گے تو بہار بدعنوانی کی بھینٹ چڑھتا ہی رہے گا۔ انھوں نے مزید کہا کہ ابھی تو پُل کا افتتاح بھی نہیں ہوا ہے۔ یہ 7-6 ماہ پہلے ہی بن کر تیار ہوا اور یہ حالت ہے۔ 20 سال پہلے جو پُل بنا تھا، وہ اب بھی درست ہے۔ ڈبل انجن کی حکومت میں بدعنوانی بھی بہت بڑھ گئی ہے۔