بہار: ذات پر مبنی مردم شماری میں 500 کروڑ روپے ہوں گے خرچ، 2023 کا ہدف

بہار کے وزیر اعلیٰ نتیش کمار نے ریاست میں ذات پر مبنی مردم شماری کا راستہ ہموار کر دیا ہے۔ پہلے کل جماعتی میٹنگ کر اس تعلق سے قرارداد پاس ہوا، اور پھر کابینہ نے بھی اس کی منظوری دے دی۔ وزیر اعلیٰ نتیش کمار کی صدارت میں جمعرات کو بہار کابینہ کی ہوئی اہم میٹنگ میں ذات پر مبنی مردم شماری کرانے سے متعلق قرارداد کو منظوری مل گئی۔ میٹنگ میں فیصلہ کیا گیا کہ اس عمل کو فروری 2023 تک مکمل کر لیا جائے۔ بتایا جا رہا ہے کہ ذات پر مبنی مردم شماری کرائے جانے میں مجموعی طور پر 500 کروڑ روپے خرچ ہونے کا اندازہ ہے۔ اس خرچ کا انتظام ’بہار کونٹنجنسی فنڈ‘ (بہار ہنگامی فنڈ) سے کیا جائے گا۔

کابینہ کی میٹنگ کے بعد چیف سکریٹری عامر سبحانی نے کہا کہ جنرل ایڈمنسٹریشن ڈپارٹمنٹ کے ذریعہ نوٹیفکیشن جاری ہوتے ہی مردم شماری کا کام شروع ہو جائے گا۔ بہار حکومت اس کے لیے اپنے وسائل کا بہتر انداز میں استعمال کرے گی۔ ذات پر مبنی مردم شماری کے لیے بلو پرنٹ تیار کر لیا گیا ہے۔ اس کے مطابق فروری 2023 تک اس کی تکمیل کا ہدف رکھا گیا ہے۔ حکومت نے ذات پر مبنی مردم شماری کی ذمہ داری جنرل ایڈمنسٹریشن ڈپارٹمنٹ کو دی ہے۔

دی گئی جانکاری کے مطابق ضلع سطح پر ذات پر مبنی مردم شماری کرانے کے لیے متعلقہ ضلع مجسٹریٹ کو نوڈل افسر بنایا گیا ہے۔ یعنی متعلقہ ضلع مجسٹریٹ کی نگرانی میں ہر ضلع میں ذات پر مبنی مردم شماری کا کام ہوگا۔ جنرل ایڈمنسٹریشن ڈپارٹمنٹ میں کام کرنے والے ملازمین کی خدمات ذات پر مبنی مردم شماری کے لیے لی جا سکیں گی۔ یہ بھی بتایا گیا ہے کہ ذات پر مبنی مردم شماری کے دوران لوگوں کی معاشی حالت کے سروے کی بھی کوشش کی جائے گی۔ علاوہ ازیں ذات پر مبنی مردم شماری میں سبھی مذاہب کے سبھی ذاتوں اور ذیلی ذاتوں کی بھی تفصیل معلوم کی جائے گی۔