نقل روکنے کے لیے بہار بورڈ نے اٹھایا سخت قدم، امتحان مراکز میں ’جوتا-موزہ‘ پر پابندی

بہار میں امتحانات کے دوران نقل کیے جانے کا معاملہ کئی بار سرخیوں میں رہا ہے۔ اب بہار بورڈ نے اس سے بچنے کے لیے کچھ نئے ضابطے تیار کیے ہیں۔ بہار بورڈ کے 12ویں کے امتحان میں کسی بھی طرح سے نقل نہ ہو اس کے لیے بورڈ نے فیصلہ کیا ہے کہ جوابی کاپی اور او ایم آر شیٹ پر امتحان دینے والے طلبا کی تصویر چپکی ہوئی ہوگی۔ واضح رہے کہ بہار بورڈ کے انٹرمیڈیٹ امتحان آج یعنی 3 فروری سے پوری ریاست میں شروع ہوئے۔

علاوہ ازیں بہار بورڈ نے اس بار امتحان دینے والے طلبا کے جوتے-موزے پہن کر آنے پر پابندی لگا دی ہے۔ اس کا نظارہ پیر کی صبح مختلف امتحان مراکز پر دیکھنے کو بھی ملا۔ پٹنہ کے جے ڈی ویمنس کالج میں کسی بھی امتحان دہندہ کو جوتے-موزے کے ساتھ داخلے کی اجازت نہیں دی گئی۔ اس سلسلے میں جے ڈی ویمنس کالج امتحان مرکز پر امتحان انچارج اے کے یادو نے بتایا کہ امتحان مراکز میں طلبا کے جوتے اور موزے پہن کر داخلے پر پابندی لگا دی گئی ہے اس لیے کسی کو جوتا پہن کر امتحان دینے کی اجازت نہیں ملے گی۔ انھوں نے کہا کہ اس امتحان مرکز پر تقریباً 1900 طلبا امتحان میں بیٹھ رہے ہیں اور سبھی بغیر جوتے-موزے کے امتحان دیں گے۔ اس کے علاوہ بہار اسٹیٹ اگزامنیشن کمیٹی کے چیئرمین آنند کشور نے کہا کہ امتحان مراکز میں امتحان دہندگان کو کسی بھی طرح کا الیکٹرانک سامان ساتھ لے جانے پر بھی روک لگائی گئی ہے۔

واضح رہے کہ بارہویں کے اس امتحان میں اس بار 12.05 لاکھ طلبا اور طالبات بیٹھیں گے۔ بہار بورڈ کے انٹرمیڈیٹ امتحان دو شفٹ میں ہوں گے۔ پہلی شفٹ کا امتحان صبح 9.30 بجے سے شروع ہوگا جب کہ دوسری شفٹ کا امتحان دوپہر 1.45 بجے سے شروع ہوگا۔ اس سال 1205390لاکھ طلبا نے امتحان کے لیے رجسٹریشن کیا ہے جس میں 5.38 لاکھ لڑکیاں اور 6.56 لاکھ لڑکے شامل ہیں۔