9 نومبر کو لالو یادو کی رہائی اور 10 نومبر کو نتیش کی وداعی طے: تیجسوی یادو

بہار اسمبلی انتخاب کو لے کر سبھی پارٹیوں کے لیڈران زور و شور سے ریلیاں کر رہے ہیں۔ آج نوادہ میں کانگریس لیڈر راہل گاندھی اور آر جے ڈی لیڈر تیجسوی یادو نے ریلی کو خطاب کیا۔ اس دوران تیجسوی یادو نے وزیر اعلیٰ نتیش کمار پر زوردار حملہ بولا۔

تیجسوی یادو نے کہا کہ نتیش کمار 15 سال سے ریاست کے وزیر اعلیٰ ہیں۔ مرکز اور ریاست دونوں جگہ ان کی حکومت ہے، لیکن اس ڈبل انجن کی حکومت میں کہیں بھی کوئی کام بغیر 'چڑھاوا' کے نہیں ہوتا ہے۔ تیجسوی یادو نے مزید کہا کہ تھانہ اور بلاک سے لے کر ہر جگہ بدعنوانی ہے۔ روزگار کے ایشو پر پی ایم مودی اور سی ایم نتیش کمار پر حملہ آور ہوتے ہوئے تیجسوی نے کہا کہ جو روزگار تھا اسے بھی دونوں نے چھین لیا۔ کورونا بحران میں سی ایم نتیش کمار اپنی رہائش میں تھے، باہر نکل کر لوگوں کی حالت جاننے کی کوشش نہیں کی۔

مرکزی اور ریاستی حکومت کو تنقید کا نشانہ بناتے ہوئے تیجسوی یادو نے کہا کہ بہار کے 18 اضلاع سیلاب میں ڈوب رہے ہیں، لیکن مرکز کی ٹیم دیکھنے نہیں پہنچی، کوئی بھی دیکھنے نہیں آیا۔ نتیش جی 144 دن تک گھر کے اندر رہے، لیکن اب ووٹ چاہیے تو باہر نکل رہے ہیں۔ نتیش کمار ہجرت کو روک نہیں پا رہے ہیں۔ بہار کا اربوں روپیہ باہر جا رہا ہے۔

تیجسوی یادو نے جلسہ میں موجود لوگوں سے پوچھا کہ کیا 15 سال میں نتیش جی نے آپ کو روزگار دیا، ہجرت روکی؟ انھوں نے ریاست میں صنعت لگوائے؟ تیجسوی نے کہا کہ "نتیش جی کہتے ہیں کہ بہار سمندر کے کنارے نہیں ہے اس لیے یہاں صنعتیں نہیں لگ سکیں، لیکن میں پوچھنا چاہتا ہوں کہ لالو جی نے ریل وزیر رہتے ہوئے مدھے پورہ، چھپرہ میں ریل کارخانہ لگوایا یا نہیں لگوایا؟ تیجسوی نے کہا کہ "دیکھو بھائی لوگو، ہم نوراتر کیا ہے، جھوٹ نہیں بولوں گا، ہم سیدھی بات کرتے ہیں اور جو کہتے ہیں وہ کر کے دکھائیں گے۔ وزیر اعلیٰ بنتے ہی پہلی اگر ہماری قلم چلے گی تو پہلی کیبینٹ میٹنگ میں 10 لاکھ نوجوانوں کو سرکاری ملازمت دیں گے۔" تیجسوی یادو نے پی ایم مودی پر بھی حملہ کیا اور پوچھا کہ اس خصوصی پیکیج کا کیا ہوا جس کے لیے آپ نے پانچ سال پہلے بہار کی بولی لگائی تھی۔

روزگار کے ایشو پر تیجسوی یادو نے وزیر اعلیٰ نتیش کمار پر جوابی حملہ کرتے ہوئے کہا کہ نتیش کمار کہتے ہیں کہ روزگار دینے کے لیے پیسہ کہاں سے آئے گا۔ بہار کا بجٹ 2 لاکھ 13 ہزار کروڑ ہے، نتیش جی صرف 60 فیصد خرچ کر پاتے ہیں۔ باقی 80 ہزار کروڑ تو ہے ہی۔ اس پیسے سے لوگوں کو روزگار دیں۔ ہماری حکومت ب نی تو ہم فوراً 10 لاکھ سرکاری ملازمت دیں گے۔

تیجسوی نے کہا کہ ان کی حکومت اعلیٰ ذات، دلتوں، غریبوں، پسماندوں، انتہائی پسماندوں، اقلیتوں سبھی کو ایک ساتھ لے کر چلے گی۔ انھوں نے لوگوں سے ہاتھ اٹھوا کر پوچھا کہ آپ لوگوں کا آشیرواد ہے نہ؟ تیجسوی نے اپنی تقریر کے دوران زوردار انداز میں کہا کہ 9 نومبر کو لالو جی کی رہائی ہو رہی ہے، اسی دن میرا یوم پیدائش بھی ہے اور 10 تاریخ کو نتیش جی کی وداعی ہوگی، یہ طے ہے۔