بہار میں آسمانی بجلی گرنے سے 12 افراد ہلاک، 7 جھلسے

پٹنہ: بہار میں کورنا کے پیش نظر نافذ لاک ڈاؤن کے درمیان سارن، جموئی ، بھوجپور اور مشرقی چمپارن ضلع میں اتوار کے روز آسمانی بجلی کی زد میں آنے سے 12 افراد کی موت ہوگئی اور 7 دیگر جھلس گئے۔

چھپرہ سے موصولہ رپورٹ کے مطابق، سارن ضلع کے مفصل تھانہ علاقہ کے کھل پورا پنچایت کے مقدوم گنج گاؤں میں آسمانی بجلی کی زد میں آنے سے نو افراد کی موت ہوگئی اور سات دیگر زخمی ہوگئے۔

ضلع رابطہ افسر گیا نیشور پرکاش نے بتایا کہ مقدوم گنج گاؤں کے کچھ لوگ کھیت میں گئے ہوئے تھے ۔ اسی دوران تیز بارش کے ساتھ ہوئے آسمانی بجلی کی زد میں آنے سے چھ لوگوں کی موت ہوگئی جبکہ دس دیگر زخمی ہوگئے۔

زخمیوں کو چھپرہ صدر اسپتال میں داخل کرایا گیا جہاں علاج کے دوران تین دیگر کی بھی موت ہوگئی ۔ مرنے والوں کی شناخت اروند کمار سنگھ (50) ، لوہ بہادر سنگھ (62) سریندر سنگھ (50) ، جیتندررائے (13) ، رویندر رائے (50)ستیہ دیو رائے (15) ، نتیش کمار (12) ، رام ناتھ رائے (45) اور چندر دیو رائے (45 ) کے طور پر کی گئی ہے ۔ لاشیں پوسٹ مارٹم کیلئے بھیج دی گئی۔

مفصل پولیس اسٹیشن کے انچارج کرم ویر سنگھ نے بتایا، ’’کھلپورہ دیارہ کے دیارہ علاقہ میں کچھ دیہاتی صبح کے وقت سبزیوں کے کھیت پر پہنچے تھے۔ دریں اثنا، تیز آندھی اور طوفانی بارش شروع ہو گئی۔ بارش سے بچنے کے لئے وہ سبھی نزدیک کی ایک جھونپڑی میں جمع ہو گئے۔ اسی اثناء میں آسمانی بجلی جھونپڑی پر گر گئی۔‘‘

تھانہ انچارج نے بتایا کہ اس واقعے میں تین دیگر افراد زخمی ہوئے ہیں، جنہیں آناً فاناً میں صدر اسپتال پہنچایا گیا ہے۔ زخمیوں کی حالت تشویشناک بتائی جا رہی ہے۔ ضلع کے سینئر عہدیدار بھی اسپتال پہنچ گئے ہیں۔ ادھر، اس واقعے کے بعد سے گاؤں میں سوگ کا ماحول ہے۔

جموئی سے موصولہ رپورٹ کے مطابق ضلع کے کھیرا تھانہ علاقہ کے بریار پور گاؤں باشندہ ستیش ٹھاکر (15) کھیت میں کام کر رہا تھا تبھی آسمانی بجلی سے جھلس کر اس کی موت ہوگئی ۔ وہیں ضلع کے آدرش تھانہ علاقہ کے ابھے پور گاﺅں باشندہ ٹارجن مانجھی (12) مویشی چرارہا تھا تبھی تیزبارش کے ساتھ آسمانی بجلی سے اس کی جھلس کر موت ہوگئی ۔

آرہ سے موصولہ رپورٹ کے مطابق ، بھوجپور ضلع کے بڑہرا تھانہ علاقہ کے بکھورا پور گاؤں میں آج آسمانی بجلی سے ایک نوجوان کی موت ہوگئی ۔ بکھورا پور گاﺅں باشندہ پشپا کماری (18) اپنے کھیت میں کام کر رہی تھی تبھی آسمانی بجلی کی زد میں آنے سے لڑکی کی موت ہوگئی ۔ لاش پوسٹ مارٹم کیلئے آرہ صدر اسپتال بھیج دی گئی ہے ۔

موتیہاری سے موصولہ رپورٹ کے مطابق مشرقی چمپارن ضلع کے پہاڑ پور تھانہ علاقہ کے نواڈیہہ گاﺅں کے اہری ٹولہ میں آج صبح ہورہی بارش کے مابین آسمانی بجلی گرنے سے سنتوش یادو کادو گھر جل کر تباہ ہوگیا ۔ واقعہ کے وقت سنتوش یادو اپنی اہلیہ کے علاج کیلئے مغربی چمپارن کے نوتن تھانہ گیا تھا۔ گھر میں کوئی نہیں تھاجس کی وجہ سے بڑا حادثہ ہونے سے ٹل گیا ۔ واقعہ کی جانکاری کے بعد فائر بریگیڈ کی ٹیم نے موقع پر پہنچ کر آپ پر قابو پایا ۔