بی جے پی حکومت جھوٹے اعلانات کرنے میں یقین رکھتی ہے: ہڈا

ہریانہ کے سابق وزیر اعلیٰ اور اپوزیشن لیڈر بھوپندر سنگھ ہڈا نے کہا ہے کہ ریاست کی بھارتیہ جنتا پارٹی کی قیادت والی حکومت صرف جھوٹے اعلانات کرنے میں یقین رکھتی ہے۔

ہڈا نے صحافیوں سے کہا کہ حکومت ہر بجٹ میں یہ سوچ کر اعلانات کرتی ہے کہ اسے پورا کرنا نہیں ہے، خواہ وہ ہر ضلع میں میڈیکل کالج کے قیام کا اعلان ہو یا دیگر اعلانات۔ حکومت نے ریاست کو قرضوں میں ڈبونے کے علاوہ کوئی کام نہیں کیا۔ اس حکومت کے اقدامات کی وجہ سے آج ریاست تقریباً تین لاکھ کروڑ روپے کے قرض تلے دبی ہوئی ہے۔ صورتحال یہ ہو گئی ہے کہ حکومت کو معمول کے کاموں اور قرض کی ادائیگی کے لیے بھی قرض لینا پڑ رہا ہے۔اس کے باوجود حکومت نے بجٹ میں بڑے اعلانات کیے ہیں۔ حکومت کے پاس نہ پیسہ ہے اور نہ ہی ان کو پورا کرنے کی کوئی نیت ہے۔

ہڈا نے کہا کہ اس حکومت نے حقائق سے توجہ ہٹانے کے لیے مہنگا (اِنفلیٹیڈ)بجٹ پیش کیا ہے، تاکہ لوگوں کو سننے میں اچھا لگے لیکن عوام اس کی حقیقت کو سمجھ چکے ہیں۔ حکومت کی جانب سے ہر بار اعلان کے برعکس مختلف کاموں کے لیے مختص بجٹ کو بعد میں گھٹا کر اونٹ کے منہ میں زیرہ ڈال دیا جاتا ہے۔ حکومت نے بجٹ میں ایک لاکھ کروڑ روپے کی سرمایہ کاری کا ہدف رکھا ہے جبکہ گذشتہ سال کے اعداد و شمار بتاتے ہیں کہ پورے سال میں ریاست میں صرف 1600 کروڑ روپے کی سرمایہ کاری ہوئی ہے۔ ایسے میں ایک لاکھ کروڑ کی سرمایہ کاری کے ہدف کو حاصل کرنے میں 50 سال سے زیادہ کا وقت لگے گا۔

انہوں نے بتایا کہ اس بجٹ سے کسانوں، مزدوروں، ملازمین، چھوٹے تاجروں، بےروزگاروں سمیت ہر طبقے کو مایوسی ہوئی ہے۔یہ بجٹ بلند ترین بے روزگاری، ریکارڈ مہنگائی، معاشی سست روی، معیشت کی خستہ حالی جیسے چیلنجز سے نمٹنے میں ناکام ثابت ہوگا۔