بھارت جوڑو نیائے یاترا آسام سے نکل کر میگھالیہ کی سرحد میں داخل

شیلانگ: کانگریس لیڈر راہل گاندھی کی قیادت میں 'بھارت جوڑو نیائے یاترا' پیر کو ایک مارچ کی شکل میں آسام سے میگھالیہ میں داخل ہو گئی۔ یہ یاترا آسام کے موریگاؤں ضلع سے نکل کر پیر کی سہ پہر میگھالیہ میں داخل ہوئی۔ میگھالیہ میں داخل ہونے کے فوراً بعد راہل گاندھی اور ان کے ساتھ آنے والوں نے میگھالیہ کے ری بھوئی ضلع کے ہیڈکوارٹر نونگ پوہ کے قریب مارچ کیا۔ دریں اثنا، راہل گاندھی نے لوگوں کو سلام کیا اور ان سے گفتگو کی۔

یاترا نے ری بھوئی ضلع کے برنی ہاٹ میں رات کو قیام کیا۔ کانگریس کے سابق صدر نے دیر شام نونگ پوہ میں ایک جلسہ عام سے خطاب کیا۔ یاترا میں شامل ایک کارکن کے مطابق راہل منگل کی صبح آسام-میگھالیہ سرحد پر نوجوانوں سے بات چیت کریں گے۔ اس کے بعد یاترا آگے بڑھے گی۔

تازہ ترین اطلاعات کے مطابق انڈین نیشنل کانگریس کی یاترا منگل کی صبح شروع ہو گئی۔ سب سے پہلے راہل گاندھی نے مجاہد آزادی سبھاش چندر بوس کو ان کے یوم پیدائش کے موقع پر خراج عقیدت پیش کیا اور پھر سفر کا آغاز کیا۔