بھارت جوڑو یاترا جاری: علی الصبح دہلی کی آزاد پور منڈی پہنچے راہل گاندھی، سبزی اور پھل بیچنے والوں اور تاجروں سے کی بات

نئی دہلی: راہل گاندھی نے ’بھارت جوڑو یاترا‘ کے دوران ہر شعبۂ حیات سے وابستہ عام لوگوں سے ملاقات کا جو سلسلہ شروع کیا تھا وہ لگاتار جاری ہے اور اب انہوں نے دہلی کی آزاد پور منڈی میں پہنچ کر سبزی اور پھل بیچنے والوں اور تاجروں سے ملاقات کر کے ان سے بات کی اور ان کے مسائل سنے۔ راہل گاندھی نے وہاں سبزیوں کے دام بھی معلوم کئے۔

راہل گاندھی جب منڈی میں پہنچے تو وہاں لوگوں کا ہجوم لگ گیا۔ خبر رساں ایجنسی پی ٹی آئی نے راہل گاندھی کے اس دورے کی ایک ویڈیو پوسٹ کی ہے۔ وہیں، کانگریس نے ویڈیو ٹوئٹ کرتے ہوئے لکھا ’’عوام کے ہیرو راہل گاندھی جی آج دہلی کی آزاد پور منڈی میں سبزی اور پھل بیچنے والوں سے ملے۔ راہل جی نے ان کے مساسئل کو جانا اور سمجھا۔ بھارت جوڑو یاترا جاری ہے‘‘

راہل گاندھی نے آزاد پور منڈی کا دورہ ایسے وقت میں کیا ہے جب بارشوں اور سیلاب کے سبب سبزیوں کے دام آسمان پر جا پہنچے ہیں۔ تماٹر کے دام تو اتنے زیادہ ہیں کہ یہ عام آدمی کی پہنچ سے تقریباً دور ہو گیا ہے۔ سبزیوں کی اس کمر توڑ مہنگائی کے حوالہ سے کانگریس پارٹی مرکزی حکومت پر حملہ آور بنی ہوئی ہے۔

حال ہی میں ایک سبزی فروش کی ایک ویڈیو وائرل ہوئی تھی، جسے راہل گاندھی نے بھی اپنے ہینڈل سے ٹوئٹ کیا تھا۔ اس ویڈیو میں سبزی فروش رامیشور ٹماٹر کے داموں کی وجہ سے جذباتی ہو جاتا ہے اور خالی ٹھیلہ لیے کھڑا رہتا ہے۔ رپورٹ جب اس سے پوچھتا ہے کہ آپ ٹماٹر لینے آیے تھے؟ جواب میں رامیشور کہتا ہے کہ ہاں، لیکن دام سن کر خریدنے کی ہمت نہیں ہو رہی۔

راہل گاندھی نے اس ویڈیو کو ٹوئٹ کرکے لکھا تھا ’’ملک کو دو حصوں میں تقسیم کیا جا رہا ہے، ایک جانب وہ تاقت ور لوگ ہیں جن کو حکومت کی پشت پناہی حاصل ہے اور دوسری جانب وہ عام ہندوستانی ہیں جن کی پہنچ سے سبزی جیسی بنیادی چیز بھی دور ہو گئی ہے۔ ہمیں امیر اور غریب کے درمیان اس خلیج کو بھر کے ان آنسوؤں کو پونچھنا ہوگا۔‘‘

اس سے قبل راہل گاندھی سبھی کو حیرت میں ڈالتے ہوئے ہریانہ کے ایک گاؤں کے کھیت میں کام رہے مزدوروں سے ملاقات کے لیے پہنچ گئے تھے۔ یہاں راہل گاندھی نے کھیتوں میں کام کر رہے مزدوروں سے بات کی، دھان کے پودوں کی روپائی کی اور ان کے ساتھ کھانا بھی کھایا۔