’بھارت جوڑو یاترا‘ بی جے پی-آر ایس ایس نظریہ کے خلاف، جس نے ملک کو نقصان پہنچایا: راہل گاندھی

کنیا کماری: کانگریس پارٹی کی ’بھارت جوڑو یاترا‘ آج تیسرے دن میں داخل ہو گئی اور صبح کے وقت تین گھنٹے سفر کرنے کے بعد قافلہ ٹھہر گیا۔ یاترا کے وقفہ کے دوران کانگریس لیڈر راہل گاندھی نے صحافیوں سے خطاب کرتے ہوئے مرکزی حکومت اور آر ایس ایس پر حملہ بولا۔ انہوں نے کہا کہ بی جے پی اور آر ایس ایس کے نظریہ نے ملک کو بہت نقصان پہنچایا ہے اور اسی کے خلاف یہ یاترا نکالی جا رہی ہے۔

راہل گاندھی سے جب یہ سوال کیا گیا کہ بی جے پی لیڈران لگاتار انہیں ہدف تنقید بنایا جا رہا ہے تو انہوں نے کہا ’’ہر ایک شخص اور تنظیم کی رائے ہوتی ہے، بی جے پی اور آر ایس ایس کی بھی اپنی رائے ہے، وہ ٹھیک ہے۔ ہمارے لئے یہ یاترا ملک کے لوگوں سے جڑنے کی یاترا ہے۔ جو نقصان بی جے پی اور آر ایس ایس کے نظریہ نے ملک کا کیا ہے، جو ملک کو تقسیم کیا ہے اور نفرت پھیلائی ہے۔ اس کے خلاف یہ یاترا کی جا رہی ہے۔‘‘

بھارت جوڑو یاترا کی ضرورت پر بات کرتے ہوئے راہل گاندھی نے کہا کہ ملک کے عوام کو تقسیم کیا جا رہا ہے۔ انہیں مذہب، ریاست اور زبان کی بنیاد پر بانٹا جا رہا ہے۔ کچھ لوگوں کو ساری جائیداد دی جا رہی ہے۔ ہندوستان لوگوں کے درمیان مکالمے کا نام ہے اور یہ مکالمہ انتہائی ضروری ہے۔

راہل نے مزید کہا کہ ’’مہنگائی اور بے روزگاری دو سب سے بڑے مسئلے ہیں۔ چار مہینوں میری خود اور ملک کے بارے میں سمجھ بہتر ہو گی، تھوڑا زیادہ سمجھ دار بن سکوں گا۔‘‘

راہل گاندھی سے جب سوال کیا گیا کہ کانگریس کے کچھ لیڈر اپنی ہی پارٹی کے خلاف بول رہے ہیں تو انہوں نے کہا ’’میرے مقابلہ بی جے پی کے پاس دباؤ ڈالنے کے بہتر طریقے ہیں۔ بی جے پی نے تمام اداروں پر قبضہ کر لیا ہے۔ یہ مقابلہ پارٹیوں کے درمیان نہیں بلکہ ہندوستانی ریاستوں کے ڈھانچے اور اپوزیشن کے درمیان ہے۔ بہت سے لوگوں کو لگتا ہے کہ بی جے پی سے ہاتھ ملا لیں، جھگڑا کیوں کریں؟ لیکن مجھے ’آئیڈیا آف انڈیا‘ کے لیے لڑنا ہے۔‘‘