کانگریس کا ’بھارت بند ‘ میوات میں مکمل طور پر کامیاب

میوات (کاماں/نوح/پونہانہ): کانگریس پارٹی کی جانب سے دی گئی ’بھارت بند ‘ کی کال کا ملک کے ساتھ ہریانہ اور راجستھان کے خطہ میوات میں بھی وسیع پیمانے پر اثر نظر آیا۔

راجستھان کے ضلع بھرت پور کی کاماں اسمبلی کے کاماں اور پہاڑی علاقہ میں بند پوری طرح کامیاب رہا۔ یہاں کانگریس کارکنان نے سابق چیف پارلیمانی سکریٹری اور کانگریس رہنما زاہدہ خان کی قیادت میں پیدل مارچ کیا گیا۔

کانگریس کارکنان نے مہنگائی کی پڑ رہی مار کو لے کر برسراقتدار بی جے پی کے خلاف زبردست نعرے بازی کی۔ اس دوران مظاہرین نے کہا کہ بی جے پی عوام مخالف اور نوجوان مخالف پارٹی ہے جبکہ کانگریس وہ واحد پارٹی ہے جو لوگوں کے مفاد میں کام کرتی ہے۔ اس موقع پر زاہدہ خان کے علاوہ پردھان جلیس خان، بلاک صدر شری چند اور دیگر کارکنان موجود رہے۔

نوح

صوبہ ہریانہ میوات کے مرکزی شہر نوح میں کانگریس پارٹی کی جانب سے بلائے گئے بند پر مکمل طور پر عمل ہوا۔ یہاں ہریانہ کے سابق وزیر اور صوبائی کانگریس کے نائب صدر چودھری آفتاب احمد کی قیادت میں سینکڑوں کارکنان و حامیوں نے شہر میں پیدل مارچ نکالا۔ مارچ کا آغاز پی ڈبلو ڈی ریسٹ ہاؤس میں واقع پارٹی دفتر سے ہوا اور سینکڑوں افراد نے مہنگائی کے خلاف زور دار نعرے بازی کی۔

مارچ شہر کے اہم راستوں اور جامع مسجد ہوتے ہوئے بائی پاس تک پہنچا۔ اس درمیان آفتاب احمد نے بی جے پی کے خلاف عوام مخالف جذبات کی ترجمانی کی۔ کانگریس کے بھارت بند کو دکانداروں نے بھی پوری طرح حمایت کی اور اپنی دکانوں کو بند رکھا۔

’بھارت بند‘ حامی مظاہرین نے ہریانہ کی بی جے پی حکومت و مرکزی حکومت کی عوام مخالف پالیسیوں اور پٹرول-ڈیزل کی تاریخی مہنگائی کے خلاف فلک شگاف نعرے بلند کئے۔ کانگریس کے پیدل مارچ کا اختتام نوح بس اسٹینڈ پر ہوا۔

پونہانہ

پونہانہ اسمبلی حلقہ انتخاب میں کانگریس کارکنان نے مہنگائی کو لے کر بی جے پی حکومت کے خلاف احتجاج کیا اور نعرے بازی کرتے ہوئے شہر بھر میں مارچ نکالا۔

مارچ سے قبل تمام کانگریسی رہنماؤں نے سینگاریا ہاؤس پر ایک میٹنگ کی اور حکمت عملی پر غور خوض کیا۔ یہ میٹنگ حاجی صاحب خان کی رہائش پر منعقد ہوئی۔ اس دوران مظاہرین نے بی جے پی کی عوام مخالف، کسان مخالف اور تاجر مخالف پالیسیوں کو لے کر بی جے پی کے تئیں اپنے غصہ کا اظہار کیا۔

اہم شرکاء میں ابراہیم انجینئر بیسرو، اختر حسین کاٹپوری، اعجاز خان کاٹپوری، صاحب خان پٹواری، سبحان خان سنگاریا، حسن فردڑی، حمید سرپنچ ہتھن گاؤں، صلی قریشی اور وسیم قریشی وغیرہ۔