بنگال ٹیچر گھوٹالہ: پارتھ چٹرجی کے خلاف ممتا نے لیا ایکشن، وزارتی عہدہ سے چھٹی

مغربی بنگال ٹیچر بھرتی گھوٹالہ معاملے میں گرفتار ترنمول کانگریس لیڈر اور ممتا حکومت میں وزیر پارتھ چٹرجی کے خلاف وزیر اعلیٰ ممتا بنرجی نے بڑی کارروائی کی ہے۔ ممتا نے گھوٹالے میں پھنسے اپنے وزیر پارتھ چترجی کو وزارتی عہدہ سے ہٹا دیا ہے۔ قابل ذکر ہے کہ گھوٹالے میں پارتھ چٹرجی کا نام سامنے آنے کے بعد ترنمول کانگریس اور ممتا بنرجی نے ان سے دوری اختیار کر لی تھی۔

مغربی بنگال حکومت کی طرف سے جاری خط میں کہا گیا ہے کہ ٹیچر بھرتی گھوٹالہ میں ملزم پارتھ چٹرجی کو فوری اثر سے ان کے وزارتی عہدہ کی ذمہ داریوں سے آزاد کیا جاتا ہے۔ یہ حکم 28 جولائی سے نافذ ہے۔ واضح رہے کہ پارتھ چٹرجی فی الحال وزیر صنعت تھے۔ جب وہ وزیر تعلیم تھے، اس دوران ہوئے گھوٹالے کے لیے ان کو گرفتار کیا گیا ہے۔

بنگال کے چیف سکریٹری کی طرف سے جاری حکم کے مطابق پارتھ چٹرجی کو وزیر صنعت کے عہدہ سے ہٹائے جانے کے ساتھ ساتھ باقی عہدوں سے بھی ہٹایا گیا ہے۔ اس میں محکمہ اطلاعات و نشریات، پارلیمانی امور سے جڑے محکمے وغیرہ بھی شامل ہیں۔

پارتھ چٹرجی کے خلاف کارروائی کرنے کے بعد ممتا بنرجی نے کہا کہ میں نے پارتھ چٹرجی کو وزارتی عہدہ سے ہٹا دیا ہے۔ میری پارٹی سخت کارروائی کرتی ہے۔ اس کے پیچھے کئی وجوہات ہیں، لیکن میں تفصیل میں نہیں جانا چاہتی۔ اس سے قبل وزیر اعلیٰ نے کہا تھا کہ وہ بدعنوانی یا کسی غلط کام کی حمایت نہیں کرتیں۔ اگر کوئی قصوروار پایا جاتا ہے تو اسے سزا دی جانی چاہیے، لیکن میرے خلاف چلائی جا رہی غلط مہم کی میں شدید الفاظ میں مذمت کرتی ہوں۔