بنگال انتخابات: سویندو نے نندی گرام میں بدمعاشوں کو پناہ دی ہے، ٹی ایم سی کی الیکشن کمیشن سے شکایت

کولکاتا: مغربی بنگال اسمبلی انتخابات کے لئے جاری سیاسی جدوجہد کے دوران ہائی پروفائل نندی گرام سیٹ پر سبھی کی نگاہیں مرکوز ہیں کیونکہ وزیر اعلیٰ ممتا بنرجی یہاں سے خود ترنمول کانگریس کی امیدوار ہیں۔ جبکہ بھارتیہ جنتا پارٹی (بی جے پی) نے ممتا کے پرانے سپہ سالار سویندو ادھیکاری کو میدان میں اتارا ہے۔ ان دونوں کے مابین دلچسپ مقابلہ ہے اور ایک دوسرے کی شکایت الیکشن کمیشن تک پہنچ رہی ہے۔

دریں اثنا، ترنمول کانگریس (ٹی ایم سی) نے سوویندو ادھیکاری پر مجرموں کو پناہ دینے کا الزام عائد کیا ہے۔ ٹی ایم سی نے الیکشن کمیشن کو بھیجے گئے خط میں کہا ہے کہ نندی گرام میں سوویندو ادھیکاری کے ذریعہ مجرموں کو پناہ دی جا رہی ہے۔ ٹی ایم سی نے کہا کہ "ہم آپ سے درخواست کرتے ہیں کہ فوری طور پر مداخلت کریں اور پولیس کے ذریعہ ضروری اقدامات اٹھائے جائیں۔"

مغربی بنگال کے چیف الیکٹورل آفیسر کو لکھے گئے خط میں، ٹی ایم سی نے کہا کہ نندی گرام میں سویندو ادھیکاری مجرموں اور سماج دشمن عناصر کو پناہ دے رہے ہیں، یہ سب حلقے کے رہائشی نہیں ہیں، ان لوگوں کو یہاں کام کے لئے لایا جا رہا ہے، جبکہ یہ سب لوگ مختلف مقامات پر مجرمانہ ریکارڈ رکھتے ہیں۔

ٹی ایم سی کی جانب سے ممبر پارلیمنٹ ڈریک او برائن نے یہ خط تحریر کیا ہے۔ ٹی ایم سی کا کہنا ہے کہ نندی گرام سے بی جے پی امیدوار سویندو ادھیکاری نے اپنے حلقہ انتخاب میں سماج دشمن عناصر کو پناہ دی ہے، یہ لوگ مقامی باشندے بھی نہیں ہیں، علاقے کے مکان مالکان کے نام کے ساتھ ٹی ایم سی نے شکایتی خط الیکشن کمیشن کو سونپا۔

ٹی ایم سی نے الزام لگایا ہے کہ کالی پد کے ایک دو منزلہ مکان میں 30-40 لڑکے رہ رہے ہیں، وہ بائیکوں پر گھومتے ہیں، یہ کولا گھاٹ، پنگالا، کانتھی اور کونٹائی میں رہتے ہیں۔ اسی طرح ہری پور میں بھی ادھیکاری کے پولنگ ایجنٹ کے ساتھ 30-40 افراد میتھ پال ناتھ کے گھر پر قیام پذیر ہیں۔