کیلاش وجے ورگیہ کے ’بلے باز‘ ایم ایل اے بیٹے آکاش کی عرضی ضمانت منظور

بھوپال: بھارتیہ جنتاپارٹی کے جنرل سکریٹری کیلاش وجے ورگیہ کے ایم ایل اے بیٹے آکاش وجے ورگیہ کو ہفتہ کی شام بھوپال کی خصوصی عدالت نے ضمانت دیدی۔ اندور تین اسمبلی حلقہ سے رکن اسمبلی آکاش کے وکیل پوشیہ متر بھارگوا نے بتایاکہ خصوصی جج سریش سنگھ نے شام کو آکاش کو ضمانت دی ۔اب ہم اس سلسلہ میں ضروری کارروائی مکمل کرتے ہوئے آگے قدم اٹھائیں گے ۔اس سے پہلے افسران اندور کی ایم جی روڈ تھانہ پولیس سے ایم ایل اے آکاش کی کیس ڈائری لیکر دوپہر کو عدالت پہنچے ،جس کے بعد یہاں معاملہ کی سماعت ہوئی ۔عدالت نے دونوں فریقوں کی دلیلیں سننے کے بعد شام کو فیصلہ سنایا۔

آکاش وجے ورگیہ کی ضمانت عرضی پر ارکان اسمبلی اور ارکان پارلیمنٹ کے معاملات کی سماعت کے لیے مخصوص عدالت کے جج سریش سنگھ نے یہاں کی سماعت کی ۔کل اس معاملہ میں سماعت شروع ہونے کے بعد جج نے اس معاملہ کی کیس ڈائری اندور سے لائے جانے کا حکم دیاتھا۔

دودن قبل اندورضلع کے خصوصی جج بی کے دیویدی نے اندور میونسپل کارپوریشن کے ملازمین کے ساتھ مارپیٹ کے معاملہ میں رکن اسمبلی آکاش وجے ورگیہ کی ضمانت عرضی خارج کردی تھی ۔انھوں نے رکن اسمبلی کو حکم دیاکہ وہ اس معاملہ میں مدھیہ پردیش ہائی کورٹ جبل پور کے ذریعہ ریاست کے ارکان اسمبلی اور ارکان پارلیمنٹ کے معاملات کی سماعت کےلیے مخصوص عدالت کے سامنے ضرورت کے مطابق اپیل کرسکتے ہیں ۔اس کے بعد رکن اسمبلی آکاش کے وکیلوں نے ضمانت کی عرضی بھوپال کی خصوصی عدالت میں پیش کی ۔

آکاش کے وکیل نے عدالت کے حکم کے بعد تسلیم کیاکہ ایم ایل اے آکاش وجے ورگیہ کے کل ہی اندور ضلع جیل سے باہر آنے کا امکان ہے ۔انھوں نے اس معاملہ میں پولیس پر ایم ایل اے خلاف جھوٹا معاملہ درج کرنے کا الزام لگاتے ہوئے کہاکہ سچائی پریشان ہوسکتی ہے لیکن شکست نہیں کھاسکتی ۔

تین دل قبل اندور میں ایک خستہ حال مکان کو توڑنے پہنچے میونسپل کارپوریشن کے ملازمین کے ساتھ رکن اسمبلی اور انکے حامیوں میں تنازعہ پیداہوگیاتھا۔اس دوران رکن اسمبلی نے کرکٹ بلے سے ملازمین پر حملہ کردیاتھا۔انھیں اسی دن عدالت میں پیش کیے جانے کے بعد عدالتی تحویل میں جیل بھیج دیاگیاتھا۔وہ فی الحال اندور جیل میں ہیں ۔